Кеш барысында ғалымның шәкірттері мен замандастары ұстаз туралы естеліктерін айтты, деп хабарлайды aqshamnews.kz тілшісі.
Алматы қаласы Ішкі саясат басқармасының Қоғамдық даму орталығы А.П. Чехов атындағы Орталық қалалық кітапханада Қазақстан Республикасының Еңбек сіңірген ұстазы, ғалым Баймұратова Бәшен Баймұратқызының 100 жылдығына арналған «Ғылымға жетелеген ұстаз» атты әдеби танымдық кездесу өткізді.
Іс-шара Ішкі саясат қағидаттарының саяси гуманитарлық идеологемасы жоспарына сәйкес және Ұстаздар күні қарсаңында ұйымдастырылды.
Кездесудің негізгі мақсаты Бәшен Баймұратқызының ұстаздық және ғылыми жолын, білім мен ғылым саласына қосқан үлесін кеңінен насихаттау, оның өнегелі өмірі мен кәсіби қызметін кейінгі ұрпаққа үлгі ету болды.
Іс-шараға ғалымның ізбасар шәкірттері, ғылыми қауымдастық өкілдері, жоғары оқу орындарының студенттері мен кітапхана оқырмандары қатысты.
Кездесудің арнайы қонағы ғалымның қызы, аудармашы, Қазақстан Жазушылар одағының мүшесі Соқпақбаева Самал Бердібекқызы болды. Ол анасы туралы естеліктерімен бөлісіп, Бәшен Баймұратқызының өмір жолы мен еңбектеріне шолу жасады.
Кеш барысында ғалымның шәкірттері мен замандастары ұстаз туралы естеліктерін айтып, оның кәсіби болмысы мен адамдық қасиеттері жөнінде ой бөлісті. Бәшен Баймұратқызының ғылыми педагогикалық мұрасы мен шәкірт тәрбиесіндегі орнына ерекше назар аударылды.
Әдеби танымдық кездесуде оқырмандардың ғылымға қызығушылығын арттыру, білім мен ізденістің маңызын дәріптеу мәселелері де қамтылды.
Кештің мазмұнын өнерпаздардың музыкалық және поэзиялық қойылымдары толықтырып, қонақтарға ән мен жырдан шашу шашылды.
«Ғылымға жетелеген ұстаз» кездесуі көрнекті ғалымның өмірі мен еңбегін дәріптеп, оның өнегесін кейінгі буынға жеткізуге бағытталған тағылымды мәдени ағартушылық шара ретінде өтті.