Қырғызстан Президенті Садыр Жапаров елде балаларға, қыздарға және әйелдерге қарсы аса ауыр қылмыстар үшін ең қатаң жаза қарастыратын заңнамалық өзгерістер әзірлеуді тапсырды, - деп хабарлайды Aqshamnews.kz тілшісі. Бұл туралы мемлекет басшысының баспасөз хатшысы Аскат Алагозов Facebook парақшасында хабарлады.
Ол аса ауыр қылмыстарға өлім жазасын енгізуді тапсырды.
"Президент заңнаманы қайта қарап, балаларға, қыздарға және әйелдерге қарсы қылмыстар үшін ең ауыр жауапкершілікті енгізуді тапсырды. Әсіресе балаларды зорлағаны және әйелдерді зорлап өлтіргені үшін өлім жазасын қарастыруды жүктеді", - деді Алагөзов.
Бұл шешім Қырғызстанды дүр сілкіндірген 17 жастағы Айсұлудың аса қатігездікпен өлтірілуіне байланысты қабылданды. Садыр Жапаров қылмыстық істің тергеуін жеке бақылауына алғаны айтылды.
Айсұлудың өлімі
27 қыркүйекте Ыстықкөл өңірінде 17 жастағы Айсұлу жоғалып кеткен. Ол құрбысына қонаққа бара жатқан, бірақ байланысқа шықпай қалған. 29 қыркүйекте оның денесі Боом шатқалынан табылды.
Оқиғаға байланысты 41 жастағы Бішкек тұрғыны күдікпен ұсталды. Тергеу деректеріне сай, ол бойжеткенді ұрлап, зорлап, өлтіргенін мойындаған. Алдымен денесін Ыстықкөл жағасына көміп, кейін қайта қазып алып, Боом шатқалына тастағаны анықталды. Күдікті бұған дейін де жыныстық сипаттағы қылмысы үшін жауапқа тартылғанымен, жазадан құтылып кеткен.
Өлім жазасы туралы тарихи дерек
Қырғызстанда соңғы рет өлім жазасы 1998 жылы орындалған. 2007 жылы өлім жазасы заң жүзінде жойылып, 2010 жылы ел БҰҰ-ның өлім жазасын жоюға бағытталған Халықаралық пактінің екінші факультативті хаттамасын ратификациялаған болатын.