Алматы жастар саясаты саласында халықаралық байланыстарды нығайтуға ерекше көңіл бөлуде.
Осы мақсатта оңтүстік астанаға Қырғыз Республикасының жастар делегациясы арнайы сапармен келді. Делегация құрамында Қырғыз парламентінің, Мәдениет министрлігінің және жастар саясатына жауапты құрылымдардың өкілдері бар, деп хабарлайды aqshamnews.kz.
Қонақтар ең алдымен Алатау хаб кітапханалар желісінде болып, оның қызметімен танысты. Сондай-ақ Әл-Фараби атындағы Қазақ ұлттық университетінің түркітанушы ғалымы Нұрат Ілияс қазақ-қырғыз халықтарының ортақ тарихы мен болашағы жайында мазмұнды баяндама жасады.
Өз кезегінде Алматы қаласы Жастар саясаты басқармасының бөлім басшысы Нұрсұлтан Бекқаиров басқарманың негізгі қызмет бағыттары туралы айтып, комьюнити орталықтарының жұмысын таныстырды.
Алматыдағы комьюнити орталықтары – жастар саясатының маңызды бөлігі. Бұл орталықтар жас кәсіпкерлерді, еріктілерді, креативті индустрия өкілдері мен белсенді жастарды біріктіріп, олардың дамуына қолдау көрсетеді. Қырғызстандық делегация орталықтардың қызметімен танысып, жастардың бастамаларын қолдау және өзін-өзі дамыту мүмкіндіктері жөнінде мол ақпарат алды.
Сапар барысында жастар жобаларын іске асыру тәжірибесімен алмасуға ерекше назар аударылды. Кездесу соңында тараптар екі ел жастары арасындағы ынтымақтастықты нығайту, бірлескен бастамаларды жүзеге асыру және достық байланыстарды дамыту мақсатында бірқатар іс-шараларды ұйымдастыруға келісті.