Қостанай облысында қар аралас жаңбыр мен көктайғақ салдарынан жүргізушілерге қиындық туды.
30 қыркүйек күні таңертең Қостанай қаласы мен бірнеше ауданда (Меңдіқара, Фёдоров, Қостанай) жауын-шашыннан кейін жолдарда бірқатар көлік оқиғасы тіркелді, - деп хабарлайды Aqshamnews.kz.
Патрульдік полиция күшейтілген жұмыс режиміне көшіп, таңғы 6:00-ден 10:00-ге дейін жол жиегіне түсіп кеткен 9 көлікті қауіпсіз жерге шығарды. Әсіресе, Қарабалық ауданы бағытындағы Қостанай–Алматы–Екатеринбург трассасында жағдай күрделі болды.
Мысалы, бір учаскеде Alphard пен Volkswagen жүргізушілері көлікті басқарудан айырылып, жолдан шығып кеткен. Полицейлер мен жақын маңдағы жүк көлігі жүргізушілері олардың көліктерін қар құрсауынан шығарып алды.
Қатты жел мен құлаған ағаштар да қауіп төндіріп тұр. Бүгіннің өзінде полицияға ағаш құлағаны туралы 10 шақырту түсті. Абай даңғылында Exeed көлігіне, Павлов көшесінде JAC көлігіне ағаш құлап, залал келтірген. Бұл фактілер бойынша материал жиналып, шешім қабылданатын болады.
Полиция жүргізушілерге келесі ескертулерді жасауда:
-
Жолға шығар алдында ауа райы болжамын тексеру;
-
Қала ішінде жаяу жүргіншілер өткелдерінде жылдамдықты азайту;
-
Тайғақ жолда арақашықтықты сақтау, күрт бұрылмау;
-
Трассада манёвр алдында жол жағдайын мұқият бағалау;
-
Ағаштардың жанына көлік қоймау.