Ішкі істер министрі Ержан Сәденов қос азаматтық үшін қылмыстық жазаны енгізуге қатысты өз ойын айтты, деп хабарлайды aqshamnews.kz
Мәжілістің бүгінгі отырысында қос азаматтық мәселесі көтерілді. Депутат Болатбек Нәжімеденұлының айтуынша, Қазақстанда қос азаматтықты жасырып жүргендер аз емес. Барлығы екі елдің жеңілдіктерін пайдаланып жүреді. Ал ұсталғандарға көбінесе айыппұл ғана салынады. Бірақ олар шетелге қашып, әкімшілік жауапкершіліктен жалтарып кетеді.
"Ондай адамдар Қазақстан азаматы ретінде өз құқықтарын біледі, бірақ міндеттерін орындамайды. Ол - азамат емес, шамаданы дайын тұрған уақытша резидент. Сондықтан қос азаматтық үшін жауапкершілікті қылмыстық жазаға дейін қатаңдату керек. Ал ішкі істер министрлігі бұл бастаманы қолдауға дайын ба?", - деді Нәжімеденұлы.
Министр Ержан Сәденов "бірлесіп жұмыс істеуге дайын" екенін мәлімдеді.
"Жалпы, дұрыс айтасыз, олардың ішінде криминал да, басқасы да болуы мүмкін. Сондықтан біз талқылауға дайынбыз. Өздеріңіз білесіздер, әрқашан сіздердің ұсыныстарыңызды қарап отырамыз. Бұл ұлттық қауіпсіздік пен тыныштық мәселесімен де тығыз байланысты. Сол себепті, әрине, талқылауға дайынбыз", - деді министр.