Алматы қаласы бойынша Қылмыстық атқару жүйесі департаментіне қарасты №11 мекемеде жазасын өтеп жатқан жасөспірімдер мен Алматы қаласы колледждерінің студенттері арасында шағын футболдан жолдастық кездесу өтті.
Колонияның жасыл алаңында өткен шағын футболға Алматы технология және флористика колледжінің «АКТИФ» командасы, Алматы сән және дизайн колледжінің «Акмисі», Алматы логистика және көлік академиясы колледжінің «АLT» командасы және балалар колониясының қызметкерлері мен тәрбиеленушілерінен құралған «Жастар» қатысты.
Жарыс тартысты өтті. Теңбіл допқа құмар жастар жасыл алаңда қызықты ойын өрнегін көрсетті. 2:0 есебімен «АLT» командасы басым түсіп 1-орын алса, №11 мекеменің «Жастары» 2-орынға ие болды.
– Біз жабық мекеме болғанымызбен, істі болып, жазасын өтеп жатқан жасөспірімдердің сыртқы ортамен байланысын мүлдем үзіп тастамаймыз, осындай спорттық іс-шараларды да жиі ұйымдастырып отырамыз. Бізде спортты сүйетін балалар өте көп. Сондықтан өзі құралпы жастарды жиі шақырып, осылай қоян-қолтық араластыру, олардың бір-біріне қолдау көрсетуіне жағдай жасау, ұйымшыл болуды, бір-бірінен жақсы дүниелерді үйренуді, жасөспірімдер арасында салауатты өмір салтын насихаттау да – тәрбие құралы, – дейді мекеме бастығы әділет полковнигі Алмат Сүлейменов.