Қазақстан Республикасының Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде еліміздегі қоғамдық-саяси өзгерістерге, жаңа сана мен әділетті қоғамға көшу үдерісіне кеңінен тоқталды. Ол қоғамдық келісім мен Ассамблеяның рөліне жаңаша қарау қажеттігін атап өтті. Бұл туралы Aqshamnews.kz сайты хабарлайды.
Мемлекет басшысы соңғы жылдары Қазақстанда үлкен өзгерістер орын алғанын айтты. Экономикалық және саяси реформалар жүзеге асырылып, халықтың қоғамдық-саяси оқиғаларға көзқарасы түбегейлі жаңарған.
"Біз заманауи және алдыңғы қатарлы қоғамға айналдық. Мұның бәрі біздегі қоғамдық келісім үлгісіне де тың талаптар қояды. Кеше ғана тиімді саналған әдіс-тәсілдер бүгін жарамсыз болуы мүмкін", – деді Тоқаев.
Президент қоғамдағы өзгерістерге лайықты түрде жауап беру үшін, Ассамблея қызметінің мәні мен мазмұнын қайта қарау қажеттігін ұсынды.
"Ассамблея мемлекеттің этносаралық саладағы барлық жұмысына бағыт беретін стратегиялық штабқа айналуы керек", – деді ол.