Ресейде QIWI Банктің лицензиясын қайтарып алу салдарынан ірі банктердің төлем қызметтері істен шығып, әсіресе, коммуналдық-шаруашылық қызметтері ақысын төлеу кезінде проблема туындады, деп хабарлайды аlmaty-akshamy.kz
Анығында, Ресей банкі QIWI тобына кіретін QIWI Банктің лицензиясын кері қайтарып алды.
Мамандар бұл Ресейдегі соңғы бір жарым жылда бірінші рет болған оқиға екенін айтып отыр. Орталық банк бұл әрекетін банктің федералды заңдар мен реттеушінің нормативтік актілерін бұзғанымен түсіндіреді.
«Әу баста банктің бизнес-моделі тәуекелі жоғары операцияларды жүргізуге негізделген еді. Қаржы институты заңды бұзды, азаматтардың жеке дерегін жөнсіз қолданып, оларға қауіп төндірді», – деді ОБ өкілі.
Осы оқиғаға орай QIWI Kazakhstan «Біз халықаралық бизнестің бір бөлігіміз, бірақ Ресей банкімен байланысымыз бар»,-деп мәлімдеді. Қазақстандық компания QIWI тобы бизнесті халықаралық және ресейлік деп екіге бөлгенін жеткізді.
«Ресейде QIWI Bank, Contact ақша аударымдары жүйесі, ROWI және Realweb компаниялар тобы, Flocktory қалды. QIWI Kazakhstan QIWI PLC халықаралық бизнесінің бөлігі болып саналады және компания осы бағдарлама аясында дамуға күш жұмсайды. Сіздердің сұрақтарыңыз көп екенін түсінеміз, қолымызға қандай да бір ақпарат түскен жағдайда, хабарлаймыз»,-деді компания өкілі.
QIWI Kazakhstan құрамына 17,2 миллионнан астам виртуалды әмиян, 181 мыңнан астам терминал, оның ішінде Қазақстандағы 30 мыңнан астам төлем қабылдау пункттері кіреді.