Бельгиядағы жоғару оқы орындарының бірінің студенті осымен төрт жыл ешқандай курсқа бармай-ақ, өз бетінше қазақ тілін оқып үйреніп жүр.
Жас жігіт бұл істе айтарлықтай жетістікке жеткен. Бүгінде ол қазақтармен емін-еркін сөйлесе алады.
Стейн Ромбоут Бельгиядағы KU Leuven университетінің үшінші курсында оқиды. Ол 2018 жылы анасымен бірге Қазақстанның оңтүстігіне турист ретінде барып қайтқан. Жергілікті тұрғындардың қонақжайлығына тәнті болған бельгиялық қазақ тілін өз бетімен оқып үйренемін деген мақсат қояды. Қазақшасының деңгейі әзірге ойдағыдай емес. Дегенмен жас жігіт оны жетік меңгере алатынына сенімді. «Болашақта Қазақстанға тағы да сапар шексем», – дейді.
«Мен басында YouTube желісі арқылы қазақша үйрендім, бірақ тек қарапайым сөздерді үйрендім. Бірақ содан кейін мен қазақша жақсырақ білгім келді. Сондықтан мен қазақ тілінің оқулығын қолдандым. Кітаптың аты – «Colloquial Kazakh», ағылшын тілде жазылған, бірақ қазақ грамматикасын өте жақсы түсіндіреді. Бірақ бір кітап жеткіліксіз, тек грамматиканы ғана меңгеріп қоймай, жаттығулар орындау да өте маңызды. Сондықтан мен онлайн қазақтармен сөйлестім. Осылайша, мен қазақ тілімді жақсарта алдым», - дейді «KU Leuven» университетінің студенті Стейн Ромбоут.
Стейн жаңа сөздерді тез жаттау үшін ұялы телефонында арнайы сөздік құрған. Бүгінде онда қазақша 2,5 мыңға жуық сөз бар. Стейн: «Қазақстанда кемі бір жыл тұрсам», – дейді. Өйткені жылдың төрт мезгілін де тамашалағысы келетін көрінеді.
«Қазақстанға бару – бұл менің тандауым. Өйткені мына жерде көп адам Испанияға, Италияға барғысы келеді, бірақ мен көбісі біле бермейтін елге барғым келеді», - дейді «KU Leuven» университетінің студенті Стейн Ромбоут.
Стейн уақытты босқа өткізбей, аудармашы не ағылшын тілінің мұғалімі секілді пайдалы іспен де айналысуды армандайды.