Қаржы мониторингі агенттігі төрағасының орынбасары Қайрат Бижанов банк картасын 500 мың теңгеден асатын сомаға толтырғанда жіберушінің ЖСН-ін енгізу талабы қосылатынын мәлімдеді, - деп хабарлайды Аqshamnews.kz тілшісі.
Бұл шара банкоматтар арқылы қолма-қол ақша шығару схемаларын тежеуге бағытталған.
Бижановтың айтуынша, банкоматтарды заңсыз ақша шешуге пайдалану әлі де өзекті. Жіберуші мен алушыны толық сәйкестендірудің болмауы аноним операцияларға жол беріп отыр.
Агенттік ұсынған негізгі шаралар:
-
500 мың теңгеден көп ақша толтыруда жіберушінің ЖСН-ін енгізу (бұған дейін тек алушының ЖСН-і талап етілетін);
-
Операцияларды мобильді қосымша немесе SMS арқылы қосымша растау;
-
2026 жылғы 1 қаңтардан бастап банкоматтардың бейнежазбаларын кемінде 180 күн сақтау (күдікті операция қатысушыларын анықтау үшін);
-
Мұндай операцияларда биометрия (бет-әлпетті/саусақ ізін тану) қолдану мүмкіндігі.
Оның сөзінше, бұл шешімдер 2025 жылғы 18 шілдеде комплаенс-қызметтер кеңесінде реттеушімен келісілген. Премьер-министр Олжас Бектенов барлық ұсынысты қолдайтынын айтты.
Айта кетейік, бұған дейін Қазақстанда банк картасын басқа біреуге беру үшін қылмыстық жауапкершілік қарастырылатыны хабарланған.