Қазақстандықтардың энергетика саласындағы белсенділігі артқаны байқалады. «Қазақстандық қоғамдық даму институты» 17 облыс пен республикалық маңызға ие 3 қалада әлеуметтік сауалнама жүргізіп, 8 мыңға жуық адамның 64%-і жалпыұлттық референдумға қатысуға дайын екендігін көрсетті.
Жақында институт өкілдері Ақтау қаласында энергетика саласының мамандары мен белсенді азаматтардың қатысуымен жиын өткізді. «Sarap» эксперттік клубы жүргізген зерттеулердің нәтижелері талқыланып, қатысушылар АЭС салу туралы пікір алмасты. Сарапшылар қатысушылардың ұсыныстарын орталық мемлекеттік органдарға жеткізуге уәде берді.
Олжас Бейсенбаев, «Қазақстандық қоғамдық даму институты» КЕАҚ басқарма төрағасының орынбасары: "Бұл бір жағынан халық арасында жүргізіліп жатқан түсіндіру жұмыстарының нәтижесі деп білемін. АЭС салу мәселесінде жергілікті тәжірибелі мамандардың пікірін есту өте маңызды. Біз Алматы, Солтүстік Қазақстан облыстарында да мамандардың көзқарастарын тыңдадық. Бүгінгі таңда қауіпсіздік, экология, маман даярлау мәселелері өңірлік деңгейде де талқыланып жатыр."