2026 жылғы 25 шілдеден бастап Қазақстан мен Біріккен Араб Әмірліктері арасындағы жүргізуші куәліктерін өзара тану және алмастыру туралы меморандум күшіне енеді, – деп хабарлайды aqshamnews.kz тілшісі.
ІІМ Әкімшілік полиция комитетінің ерекше тапсырмалар жөніндегі аңа инспекторы Ақтоты Боранованың айтуынша, меморандумның басты мақсаты – Қазақстан мен БАӘ азаматтарының жүріп-тұруын жеңілдету және көлік басқару мен жүргізуші куәлігін алмастыру кезінде оларды артық әкімшілік рәсімдерден босату.
Енді БАӘ-ге туристік, іскерлік немесе жеке мақсатпен келетін Қазақстан азаматтары қолданыстағы қазақстандық ұлттық жүргізуші куәлігімен көлік басқара алады. Дәл осындай тәртіп БАӘ азаматтары үшін де Қазақстанда қолданылады.
Бұдан бөлек, БАӘ-де тұруға ықтиярхат алған қазақстандықтар жүргізуші куәлігін емтихан тапсырмай-ақ алмастыра алады. Бұл норма тек B және B1 санаттарына (жеңіл автокөліктер) ғана қолданылады.
Куәлікті алмастыру үшін мыналар қажет:
тұруға ықтиярхаттың болуы;
B немесе B1 санатындағы ұлттық жүргізуші куәлігі;
18 жасқа толуы;
жүргізуші куәлігінің баратын елдің мемлекеттік тіліне ресми аудармасы;
медициналық тексеруден өту.
Бұл ретте ұлттық жүргізуші куәлігі иесінде қалады. Екі елдің құзыретті органдары жасалған алмасу туралы бір-біріне тек хабарлама жіберіп отырады.
ІІМ, сонымен қатар, шетелге шығатын Қазақстан азаматтарына баратын елдің заңнамасымен және жол жүру ережелерімен алдын ала танысып, оларды қатаң сақтау қажеттігін еске салды.