Азия үстел теннисі одағы (ATTU) Қарағандыдан шыққан Тимур Қожақаевтың ATTU техникалық және төрешілер комитетінің мүшесі болғанын Қазақстан федерациясына хабарлады.
Бұл қазақстандық төрешінің жоғары біліктілігінің айқын дәлелі, деп хабарлайды aqshamnews.kz ҰОК-ке сілтеме жасап.
Комитеттің негізгі міндеттеріне мыналар кіреді:
- Азия кубогы, Азия чемпионаты, сондай-ақ ATTU ұйымдастыратын турнирлер мен жарыстарға төрешілерді іріктеу;
- Төрешілерді даярлау және олардың біліктілігін арттыруды ұйымдастыру;
- Азияда төрешілермен жұмыс істеу үшін нұсқаушыларды дайындау;
- Төрешілерге арналған семинарлар өткізу, әдістемелік және оқу-кеңес беру жұмыстарын жүзеге асыру.
Айта кетейік, Тимур Қожақаев – еліміздегі жалғыз Blue Badge санатындағы халықаралық төреші. Бұл санат оған әлем, Азия, Еуропа чемпионаттарының шешуші кезеңдерінде және Олимпиада ойындарында төрешілік етуге мүмкіндік береді.