Ресей астанасы Мәскеуде «Құжаттарды реставрациялау: дәстүр мен жаңашылдық» атты VIII халықаралық ғылыми-тәжірибелік семинар өтті, – деп хабарлайды aqshamnews.kz тілшісі.
Іс-шара Қазақстан, Ресей, Армения, Әзербайжан, Беларусь, Мысыр, Қырғызстан, Тәжікстан және Өзбекстан елдерінен келген реставраторларды, қор сақтаушыларды және осы сала мамандарын бір арнаға тоғыстырды. Қазақстан атынан семинарға Қолжазбалар мен сирек кітаптар ұлттық орталығы мен ҚР Ұлттық кітапханасының өкілдері қатысты.
Семинар барысында әр елдің жетекші мамандары өз тәжірибелерімен бөлісіп, құжаттарды қалпына келтіру мен сақтау ісіндегі өзекті тәсілдерді, сондай-ақ саланың даму үрдістерін талқылады.
Тәжірибелік бөлім аясында қатысушыларға арнайы тренингтер мен шеберлік сабақтары ұйымдастырылып, реставрация, қағаз жасау және кітап түптеу ісінің түрлі әдіс-тәсілдері таныстырылды.
Айта кетейік, бұл семинар мәдени мұраны сақтау саласындағы тәжірибе алмасуға арналған ірі халықаралық алаңдардың бірі саналады.