Отандық дизайнер этникалық стильде пішілген көйлектермен шетелді бағындырып жүр.
Этникалық стильдегі қалыңдықтың салтанатты көйлектерін пішіп жүрген Анастасия Романованың әр уақыты санаулы, әр күні бағалы. Қыркүйек айында отандық дизайнер Италияның Милан қаласындағы шоуға, ал одан бұрын Түркияда 20 киім үлгісінен құрылған жеке топтамасын ұсынады, деп хабарлайды Almaty-akshamy.kz
Ұлттық нақыштағы алғашқы көйлегін ол осыдан 6 жыл бұрын дүниеге әкелген.
«Мен киім үлгілерінің өз бойына ұлттық нақыш пен заманауи сән үлгісін үйлестірген ерекше мәнерде болғанын қаладым. Сондықтан жұмыстарымыз Қазақстан нарығында ұсынған өзге үлгілерден ерекшеленіп тұрады», - дейді қалыңдық көйлектерінің дизайнері Анастасия Романова.
Шебер велюр және барқыт сияқты тығыз маталармен жұмыс істеуден бас тартқан. Киім үлгісі тапсырыс берушінің талғамына сай жасалады. Яғни, өзгеде кезікпейтін, қайталанбас дара үлгіде болады. Олардың бірінде нәзік қыздарға арналған «қалыңдықтың тасы» деп аталып кеткен раушан кварцын кезіктірсеңіз, енді бірі өзіне сенімді сәнқойлардың талғамынан шығатын әсем нефритпен безендірілген. Бұндай киім үлгілеріне тапсырыс ел ішімен қатар шет мемлекеттерден жиі түсіп жатады.
Көздің жауын алатын қазыналы қазақ мәдениеті өзінің бірегейлігімен әлемді өзіне баурап алды. АҚШ, Ресей, Франция тіпті Оңтүстік Африка сынды алыс сырт мемлекеттер қазақстандық зергер Георгий Мариниченконың ерекше жұмыстарымен жақсы таныс. Жаңа этникалық бағытта жасалатын әшекей бұйымдары кеңге танымал. Шебер тек Қазақстан аумағынан табылған бағалы тастарды заманауи құралдардың көмегінсіз дәстүрлі түрде қолмен өңдейді.
«Мен біздің жаңа этникалық бұйымдарды жасауға ден қоямын. Бай мәдениетімізді шетелге таныту үшін оларды Германия, Америка сынды елдердегі көрмелерге шығарғым келеді. Отандастарымды жақсы түсіну үшін қазір қазақ тілін меңгеруді қолға алдым»,- дейді зергер Георгий Мариниченко.
.