Оқу-ағарту министрі Жұлдыз Сүлейменова депутаттардың балалар мен жасөспірімдердің әлеуметтік желіге қолжетімділігін шектеу туралы ұсынысына қатысты пікір білдірді. Бұл туралы ол Үкіметтегі брифингте айтып, мәселені қазір министрлік деңгейінде зерделеп жатқанын мәлімдеді, деп хабарлайды Аqshamnews.kz тілшісі.
Министрдің айтуынша, ведомствода арнайы жұмыс тобы құрылған, ал басты мақсат – балаларды құқыққа қайшы контенттен қорғау. Ол бұл тәжірибенің бірқатар елдерде қолданылып жүргенін атап өтті.
«Қазір шектеу мәселесін қарастырып жатырмыз, бірнеше ұсыныс бар. Жұмыс тобы құрылды. Балаларды құқыққа қайшы контенттен қорғағымыз келеді. Бұл мәселе ашық түрде қоғаммен, соның ішінде ата-аналармен, педагогтермен және БАҚ өкілдерімен талқыланады», – деді Жұлдыз Сүлейменова.
Министрлік қарастырып отырған ықтимал шаралар ретінде мыналарды атады:
-
балаларға арналған SIM-карталарды тіркеу – қолжетімділікті бақылаудың алғашқы қадамы;
-
14 жасқа дейінгі балалар тұтынатын контентті мониторингтеу – құқыққа қайшы материалдарды анықтап, бұғаттау үшін;
-
мектептерде цифрлық және медиасауаттылықты күшейту – интернет пен әлеуметтік желілерді қауіпсіз пайдалануды түсіндіру.
Сүлейменованың айтуынша, бастама әзірге талқылау кезеңінде, нақты шешім қабылданбаған. Жұмыс тобының алғашқы отырысы өткеннен кейін қосымша ақпарат жарияланатыны айтылды.
Еске салайық, желтоқсан айында Қазақстанда онлайн-платформаларда 16 жасқа дейінгі пайдаланушылардың тіркелуіне тыйым енгізуді көздейтін заң жобасы дайындалғаны хабарланған. Құжатты Мәдениет және ақпарат министрлігі әзірлеген, кейін бұл шектеу әлеуметтік желілердегі тіркеуге қатысты болатыны нақтыланған болатын.