Ол аталған қашықтықты 27:35.44 көрсеткішімен бағындырды
Жеңіл атлетикадан Қазақстан командасы Кувейтте 18 жасқа дейінгі спортшылар арасында өтіп жатқан Азия чемпионатында алғашқы алтын медаліне қол жеткізді, деп хабарлайды Almaty-akshamy.kz.
Федерацияның ресми парақшасында хабарланғандай, ел қоржынына бас жүлдені бірінші болып Сабрина Арзиева сыйлады.
Нақтырақ айтсақ, Арзиева спорттық жаяу жүрісте 5000 метрге жарысудан алдына жан салмады.
Ол аталған қашықтықты 27:35.44 көрсеткішімен бағындырды. Бұл - қазақстандық атлеттің құрлықтық жарыстардағы жеңіп алған алғашқы ірі жүлдесі.
Кувейттегі Әл-Рашадан стадионында өтіп жатқан Азия чемпионатында 33 мемлекеттен келген 400-ден аса жеңіл атлет сынға түсіп жатыр.
Олардың қатарында 27 қазақстандық спортшы ел намысын қорғайды.
Бүгін, яғни 13 қазанда алауы тұтанған Азия чемпионаты 16 қазан күні мәресіне жетеді.