8 тамызда Алматы облысы Жамбыл ауданына қарасты Үлкен ауылы маңында Қазақстан тарихындағы алғашқы атом электр станциясының (АЭС) құрылысы ресми түрде басталады, деп хабарлайды Аqshamnews.kz. Бұл туралы Атом энергиясы агенттігі мәлімдеді.
Салтанатты рәсім барысында жобаның ресми ашылуы өтеді. Жиынға мемлекеттік органдар өкілдері қатысып, сөз сөйлейді. Сонымен қатар, топырақ сынамаларын алу мақсатында бұрғылау жұмыстары басталып, алынған үлгілер кейіннен зерттеу үшін ресейлік тарапқа тапсырылады. Капсуланы тапсыру рәсімі де ресми түрде өтеді.
АЭС жобасының бас мердігері ретінде ресейлік "Росатом" компаниясы таңдалған. Ол консорциумның жетекшісі ретінде құрылыстың негізгі жұмыстарына жауапты болады.
Айта кетейік, биыл ақпанда Үлкен ауылы АЭС салынатын ресми орын ретінде бекітілген болатын. Бұған дейін бұл аймақ әлеуетті нысандар қатарында қарастырылған еді.
2024 жылдың қаңтарында Мемлекет басшысы Қасым-Жомарт Тоқаев Үкімет пен "Самұрық-Қазына" қорына атом энергетикасын дамыту стратегиясын әзірлеуді, соның ішінде екінші атом станциясының орнын анықтауды тапсырған болатын.