Жеке академияларға "ұлттық" сөзін атауларында қолдануға тыйым салынды, деп хабарлайды aqshamnews.kz
Қазақстанда заңнамалық өзгерістер аясында жеке академиялардың атауында «ұлттық» сөзін қолдануға шектеу енгізілді. Бұл түзетулер «Білім туралы», «Ғылым және технологиялық саясат туралы», сондай-ақ «Қайырымдылық туралы» заңдарға енгізілетін ілеспе өзгерістер қатарында қарастырылған.
Енді мемлекет қатыспайтын, заңды тұлға ретінде тіркелген жеке академиялар өз атауында «ұлттық» сөзін толық немесе қысқартылған түрде, кез келген тілде қолдана алмайды. Бұл шара академиялық атаулардың маңыздылығын сақтау және білім беру ұйымдарының мәртебесін нақтылау мақсатында қолға алынған.
Сонымен қатар, заң жобасына тағы бір маңызды түзету енгізілді. «Арал өңіріндегі экологиялық қасірет салдарынан зардап шеккен азаматтарды әлеуметтік қорғау туралы» заңға сәйкес, Түркістан облысына қарасты Кентау қаласы және оған іргелес Ащысай, Хантағы, Байылдыр, Қарнақ, Қүшата және Шаштөбе ауылдары экологиялық жағдайдың алдын-алу аймағы ретінде танылатын болды. Бұл қадам өңір халқын әлеуметтік және экологиялық тұрғыдан қорғауға бағытталған.