Партияларды тіркеуге қойылатын талаптар өзгереді.
Қазақстанда саяси партия құрып, оны тіркеу процесі жеңілдеді. ҚР Әділет вице-министрі Алма Мұқанова осындай мәлімдеме жасады, деп хабарлайды Almaty-akshamy.kz ҚазАқпаратқа сілтеме жасап.
«Саяси партияларды тіркеуге қойылатын талаптар өзгереді. Ендігі уақытта саяси партияны тіркеу үшін 20 мың емес, 5 мың мүше жеткілікті. Ал өңірлік өкілдіктерінің саны 600-ден 200 адамға дейін азайтылды. Сол сияқты саяси партия құру үшін азаматтардың бастамашыл тобының ең азы 1 мыңнан 700 адамға дейін төмендетілді. Одан бөлек, партия құру жөніндегі құрылтай съезін өткізу мерзімін 2 айдан 3 айға дейін ұлғайту бойынша түзету көзделген»,- деді Алма Мұқанова ОКҚ-де өткен брифингте.
Сондай-ақ, вице-министрдің айтуынша, жер және оның ресурстарын халық меншігіне белгілеуде Конституцияның 6-бабына нақтылайтын түзетулер енгізілді.
«Келесі заңнамалық өзгеріс бұл судьялық лауазымдарға конкурстық рәсімдерді онлайн-трансляциялауды енгізуге қатысты. Сол сияқты норма шығару процесін жеңілдетуге және нормаларды реттеу деңгейлерін нақтылауға, мәслихат төрағасы лауазымын енгізуге бағытталған жекелеген түзетулер қарастырылды», - дейді ол.
Бұған дейін ҚР Парламенті мен Үкіметінің өкілеттігіне қатысты заңнамаға бірқатар өзгеріс енгізілгенін хабарлаған едік.