Қазақстанда қыркүйектен бастап не өзгереді?

  • 10:54, 29 тамыз 2025
Қазақстанда қыркүйектен бастап не өзгереді? Almaty-akshamy.kz

Күздің алғашқы айы қазақстандықтар үшін бірқатар жаңалықтарпен басталмақ. Биыл Конституция күні (30 тамыз) сенбіге түскендіктен, қазақстандықтар 1 қыркүйек те демалады. Ал мектеп оқушылары жаңа стандарт бойынша тамақтануды бастайды. Бұдан бөлек, қыркүйектен бастап бірнеше маңызды өзгеріс күшіне енеді. Олар қандай? Аqshamnews.kz тілшісі тізді. 

Мобильді аударымдар қатаң тексеріледі

Енді үш ай ішінде 1 миллион теңгеден астам мобильді аударым жасағандар салықтық тексеруге ілігуі мүмкін. Бұл өзгеріс ҚР Салық кодексіне енгізілген түзетулерде қарастырылған. Президент Қасым-Жомарт Тоқаев шілдеде заңға қол қойған болатын.

Алайда жақын туыстар арасындағы аударымдар тексерілмейді. Қаржы вице-министрі Ержан Біржановтың айтуынша, мұндай жағдайда азаматтарға алаңдаудың қажеті жоқ.

Жылжымайтын мүлік иелеріне жаңа төлемдер енгізіледі

15 қыркүйектен бастап пәтер, паркинг орны немесе қойма иелері үш түрлі төлемді төлеуге міндетті болады:

  • Ағымдағы жарна – үйді басқару мен күтіп-ұстауға кететін ай сайынғы шығындар.

  • Жинақ жарнасы – күрделі жөндеуге арналған қор.

  • Мақсатты жарна – белгілі бір қажеттілікке арналған төлем.

Жарнаның көлемі пәтердің немесе орынжайдың ауданына байланысты болады. Оның ең төменгі мөлшерін мәслихат белгілейді.

Ереже бұзғандар айыппұлдың орнына қоғамдық жұмысқа жегіледі

1 қыркүйектен бастап Қазақстанда жол қозғалысы ережесін қайталап бұзғандарға айыппұлдың орнына қоғамдық жұмыстар тағайындалады. Жаңа талап жүргізушілерге де, жаяу жүргіншілерге де, электрсамокат қолданушыларына да қатысты.

  • Жедел жәрдем, полиция немесе өрт сөндіру көліктеріне жол бермеген жүргізушілер.

  • Жолды рұқсатсыз кесіп өтіп, апатқа себеп болған жаяу жүргіншілер.

  • Жол қозғалысына кедергі келтірген электрсамокат мінушілер.

Мысалы, жол бермеген жүргізушіге 20 сағат қоғамдық жұмыс жүктелуі мүмкін. Қоғамдық жұмыс түріне көшелерді тазалау, саябақтарды күтіп-баптау немесе әлеуметтік нысандарды жөндеу кіреді. Мұндай жұмыстар кезінде адамдар "Қоғам алдындағы борышымды өтеп жүрмін" деген жазуы бар жилет киеді.

Бұл шара қоғамдағы тәртіпті күшейтуге, жол қауіпсіздігін арттыруға және азаматтардың жауапкершілігін көтеруге бағытталған.

Оқушылар мектепке қайта оралады

Жаңа оқу жылы 2 қыркүйекте басталады. Салтанатты жиын күнін әр мектеп өзі белгілей алады. Биыл алғаш рет мектеп табалдырығын 370 мыңнан астам оқушы аттайды.

Оқу жылы 2026 жылдың 25 мамырына дейін жалғасады.

Жеке кәсіпкерлерді тіркеу тәртібі өзгереді

15 қыркүйектен бастап тұрақты түрде жалдамалы жұмысшы ұстайтын және табысы 360 АЕК-тен (шамамен 1,4 млн теңге) асатын азаматтар міндетті түрде жеке кәсіпкер ретінде тіркелуі тиіс. Бұған дейін мұндай талап табысы ең төменгі 12 жалақыдан асқандарға ғана қолданылатын.

Колледждердегі жұмысшы мамандықтар тегін болады

9-сыныптан кейін колледжге түскен жастар ең сұранысқа ие техникалық мамандықтарды тегін оқи алады. Бұл бастама жастарды қолдап, еңбек нарығын жаңа кадрлармен толықтыруға бағытталған.

Қазір елде 772 колледж бар, онда 565 мыңнан астам студент білім алады. Оқу орындарына қамқорлық жасайтын кәсіпорындар саны 500-ден асады, ал болашақта олардың санын 4 мыңға жеткізу жоспарланып отыр.

Қыркүйекте қазақстандықтарды үлкен концерттер күтіп тұр

  • 6 қыркүйек – Минскіден шыққан танымал орындаушы Макс Корж Алматыдағы Орталық стадионда концерт беретіні айтылған болатын. Барлық билеттер сатылып кеткен. Алайда ұйымдастырушылар барлық қажетті құжатты уақытында тапсырмағандықтан концерт болмайтын болды. 

  • 7 қыркүйек - Орталық стадионта танымал әнші Мирас Жүгінісовтың концерті өтеді. Әнші мұндай деңгейде Алматыда алғаш рет концерт бергелі отыр. 
  • 21 қыркүйек – әлемге әйгілі Backstreet Boys тобы Орталы стадионда өнер көрсетеді. Билеттер құны 40 мың теңгеден басталады.

Сондай-ақ, "Қайрат" ФК Чемпиондар лигасының жалпы кезеңіне шықты. Күні кеше ЧЛ-ның жеребе тарту рәсімі өтіп, алматылық клубтың қарсыластары анықталды. Алматыға әйгілі "Реал Мадрид" клубы келіп, "Интер", "Арсенал" сынды белді клубтармен сырт алаңда текетіреседі. Ойындар 16 қыркүйекте басталып, 28 қаңтарға дейін жалғасады. Оның қорытындысы бойынша ең мықты сегіз команда тікелей 1/8 финалға өтеді, ал тоғызыншы мен 24-ші орын алған клубтар плей-офф матчтарына қатысады.

Жалпы кезеңнің толық кестесі, оның ішінде Қайраттың қатысуымен өтетін ойындар 30 тамызда шығады.

Әлемде не жаңалық?

  • Жаңа iPhone 17 таныстырылады. Apple компаниясы қыркүйектің алғашқы онкүндігінде жаңа смартфон желісін ұсынады. Әртүрлі үлгілерінің бағасы 799 доллардан (шамамен 430 мың теңге) басталады. Сатылым 19 қыркүйекте басталуы мүмкін.

  • 7 қыркүйек – Жер тұрғындары сирек кездесетін Айдың толық тұтылуын тамашалайды. Қазақстан уақытымен 22:30–23:52 аралығында құбылыстың толық фазасы байқалады.

Сіздің реакцияңыз?
Ұнайды
0
Ұнамайды
0
Күлкілі
0
Шектен шыққан
0
Соңғы жаңалықтар

17:34

17:34

16:44

16:43

16:36

16:07

16:06

15:56

15:29

15:00

14:45

14:43

14:38

13:31

13:03

12:49

12:00

11:24

11:12

11:11

10:54

10:51

10:21

10:15

10:13