Елімізде қант диабетіне шалдыққан азаматтардың өмір сапасын жақсарту мақсатында кешенді шаралар жүргізілуде.
Қоғам денсаулығына елеулі әсер ететін бұл ауруды ерте анықтау, дұрыс емдеу және алдын алу үшін мемлекет тарапынан тегін медициналық көмекті кеңейту, диабет мектептерінің қызметін күшейту және халық арасында тұрақты скрининг өткізу шаралары қолға алынуда, деп хабарлайды aqshamnews.kz.
Бұл туралы Өңірлік коммуникациялар қызметінің баспасөз брифингінде Қазақстан Республикасының Диабет қауымдастығының (ҚРДҚ) президенті Баян Жуманова мәлімдеді.
Бүгінгі күні мемлекетімізде 500 мыңнан астам адам қант диабетімен тіркелген, олардың 10%-ы 1-ші типті, ал 90%-ы 2-ші типті диабетке шалдыққан. Науқастарға дұрыс тамақтану, қандағы қант деңгейін тұрақты бақылау және салауатты өмір салтын ұстану қажеттігін түсіндіру мақсатында елімізде арнайы диабет мектептері жұмыс істейді.
«Диабет мектебінде пациенттерге көмірсуларды есептеу, нандық бірлік (ХЕ) қолдану, инсулин мөлшерін дұрыс анықтау және физикалық белсенділікті сақтау дағдылары үйретіледі. Бұл олардың ауруын тиімді басқаруға және өмір сапасын арттыруға көмектеседі», – деді Баян Жуманова.
Диабетпен ауыратын азаматтарды тегін дәрі-дәрмекпен қамтамасыз ету және медициналық көмек көлемін ұлғайту мақсатында мемлекет жаңа шараларды енгізуде.
«Елімізде 1-ші типті диабетпен ауыратын барлық азаматтар инсулинмен толықтай тегін қамтамасыз етіледі. Қосымша қандағы қант деңгейін өлшейтін құрылғылар мен тест жолақтары да тегін беріледі. 2-ші типті диабетке шалдыққандар үшін де тегін дәрі-дәрмек қарастырылған, бірақ олар сирек қант өлшейтіндіктен, тест жолақтарының саны шектеулі болады», – деп атап өтті Баян Жуманова.
2024 жылы диабетке қарсы скринингтік тексерулер мен білім беру бағдарламалары кеңейтілді. Республика өңірлерінде эндокринологтар мен жалпы тәжірибе дәрігерлеріне диабетті емдеу бойынша оқу семинарлары өткізілді.
Диабетті ерте кезеңде анықтау аса маңызды, себебі бұл аурудың асқыну қаупін төмендетуге көмектеседі. Осыған байланысты Қазақстанда әрбір азаматтың жылына бір рет қандағы қант деңгейін тегін тексеру мүмкіндігі қарастырылды.
2024 жылдың басынан бері елімізде 492 000 азамат қант диабеті диагнозымен тіркелген. Халық арасында диабетті ерте анықтау шараларының күшейтілуіне байланысты ауруды ерте ауыздықтауға мүмкіндік туып отыр.
«Диабеттің алдын алу үшін оның ерте анықталуы өте маңызды. Сондықтан біз скринингтік бағдарламалар арқылы халықты уақытылы тексеруге шақырамыз. Әрбір 35 жастан асқан азамат жылына бір рет қандағы қант деңгейін тексеруі қажет», – деп мәлімдеді Баян Жуманова.