1 қаңтардан бастап міндетті әлеуметтік медициналық сақтандыру (МӘМС) пакеті кеңейтілді.
Енді бірқатар созылмалы ауру осы жүйе аясында көрсетілетін медициналық қызметтер қатарына енгізілді. Бұл туралы Әлеуметтік медициналық сақтандыру қоры мәлім етті, - деп хабарлайды Aqshamnews.kz.
Атап айтқанда, МӘМС пакеті қант диабеті, балалардың церебралды сал ауруы, ревматизм, дәнекер тіндерінің жүйелі зақымдануы сияқты ауруларды қамтиды.
Осылайша, МӘМС әлеуметтік маңызы бар 11 аурудан басқа созылмалы дерттердің басым бөлігін өтейді. Ал аталған 11 ауру тегін медициналық көмектің кепілдік берілген көлемі (ТМККК) аясында қаржыландырылады. Олардың қатарында туберкулез, АИТВ, қатерлі ісіктер, созылмалы вирусты гепатиттер мен бауыр циррозы, психикалық бұзылыстар, орфандық аурулар, жүйке жүйесінің дегенеративті аурулары, орталық жүйке жүйесінің демиелинизациялық сырқаттары, эпилепсия, жедел миокард инфаркті (алғашқы 6 ай), инсульт (1 жыл ішінде) бар.
Бірыңғай пакеттің кеңеюі әлеуметтік маңызы бар ауруларды ерте анықтау кепілдіктерін күшейтуге мүмкіндік береді. Атап айтқанда, онкологиялық скринингтер сақтандыру мәртебесіне қарамастан Қазақстанның барлық азаматына қолжетімді болады.
Қазір ТМККК аясында тек туберкулез бен АИТВ-инфекциясын анықтау қарастырылған, ал басқа әлеуметтік маңызы бар ауруларды диагностикалау МӘМС есебінен жүргізіледі.
Сонымен қатар сақтандырылмаған азаматтар да базалық медициналық қызметтер пакетін пайдалана алады. Оған мыналар кіреді:
• емханаларға алғашқы жүгіну;
• вакцинация және онкологиялық скринингтер;
• әлеуметтік маңызы бар ауруларға күдік туындаған кездегі диагностика;
• жедел жәрдем қызметі;
• өміріне қауіп төндіретін жағдайлардағы шұғыл медициналық көмек;
• барлық әлеуметтік маңызы бар ауру бойынша диагностика, емдеу, алдын алу және тегін дәрі-дәрмекпен қамтамасыз ету;
• жұқпалы аурулар кезінде медициналық көмек;
• қан препараттарымен қамтамасыз ету;
• паллиативтік көмек және ауыр науқастарға ұзақ мерзімді күтім.
Онкоскринингтердің баршаға қолжетімді болуы қатерлі ісіктерді ерте кезеңде анықтап, тиімді ем жүргізуге мүмкіндік береді.
Барлық сақтандырылған азамат бұрынғыдай тегін ем алып, дәрігер кеңесіне жүгініп, қажетті дәрі-дәрмектермен қамтамасыз етіледі. Қазіргі таңда 12 миллионнан астам адам жеңілдікті санатқа жатады, олардың сақтандыру жарнасын мемлекет төлейді.
Сонымен қатар 2026 жылғы 1 қаңтардан бастап өмірлік қиын жағдайға тап болған шамамен 1 миллион азамат жергілікті атқарушы органдар есебінен сақтандырылады.
Азаматтар «D» немесе «E» санатына жататынын білу үшін тіркелген емханасына жүгінуі қажет.
Сақтандырылған мәртебе тегін талдаулардан өтуге, диагностикаға, дәрігер кеңесіне, жоспарлы операцияларға, емделуге және оңалту шараларына қол жеткізуге мүмкіндік береді.
Өз мәртебеңізді төмендегі құралдар арқылы тексеруге болады:
• Telegram-дағы SaqtandyryBot; (https://t.me/SaqtandyryBot);
• ӘМСҚ ресми сайты (https://msqory.kz/ru/naseleniyu/uznat-status-kalkulyator-osms/uznat-status-zastrakhovannosti/);
• Qoldau 24/7 мобильді қосымшасы;
• eGov.kz порталы немесе eGov mobile қосымшасы;
• кейбір екінші деңгейлі банктердің мобильді қосымшалары.
