Азық дайындау жұмыстарын үйлестіру үшін Ауыл шаруашылығы министрлігінің жанынан республикалық жедел штаб құрылды.
Қазақстан үкіметі үстіміздегі жылы мал азығын дайындау жұмыстарына ерекше назар аударып отыр. Барлық облыстарда алдағы қысқа арналған төрт түлік малға жем дайындау жоспарлары анықталды, деп хабарлайды Almaty-akshamy.kz.
«Биыл ауа райының қолайсыздығына байланысты Атырау, Қызылорда, Маңғыстау, Түркістан және ішінара Алматы облыстарында малды азықпен қамтамасыз ету жағдайы қиындады. Құрғақшылық салдарынан Маңғыстау облысында және Қызылорда облысының Арал ауданында мал өлімі тіркелді. Маңғыстау облысы бойынша 1 147 ауыл шаруашылығы жануары немесе облыстың жалпы мал басының 0,13%-ы, Қызылорда облысы бойынша - 492 бас немесе облыстың ауыл шаруашылығы жануарының жалпы мал басының 0,03%-ы өлді»,– делінген Ауыл шаруашылығы министрлігінің баспасөз-қызметінің хабарламасында .
ҚР Ауыл шаруашылығы министрлігі жанынан жем-шөп дайындау мәселелері бойынша жергілікті атқарушы органдардың іс-қимылын үйлестіру үшін республикалық жедел штаб құрылды. Штаб отырысы үнемі өткізіліп тұрады. Облыс әкімдіктерінің жанынан да азық дайындау мәселелерін тұрақты түрде мониторингілеу және жедел шешу үшін жедел штабтар құрылды. Барлық облыстарда алдағы қысқа арналған ауыл шаруашылығы малдарына жем дайындау жоспарлары анықталды.
Құрғақшылықтан зардап шеккен өңірлердің фермерлері үшін мал жаюға жайылымдар беру және шөп шабуды ұйымдастыру бойынша өңіраралық өзара іс-қимыл ұйымдастырылуда.
Шөп шабу үшін пайдаланылмайтын және жайылмалы шалғындарды бөлу бойынша жұмыстар жүргізілуде. Халыққа орман шаруашылығы аумақтарында және табиғи резерваттарда шөп дайындау мүмкіндігі беріледі, ауыл тұрғындарына егін жинау жұмыстарынан кейін алқаптардан сабан жинау мүмкіндігі беріледі.
Облыс әкімдіктерінің жедел деректеріне сәйкес, 2021 жылғы 7 шілдедегі жағдай бойынша өңірлер 6,5 млн тонна шөп дайындалған.
Маңғыстау облысына 13 мың түп және 92 орам шөп әкелінді, апта сайын 5 вагон кебек жеткізілуде. Көршілес облыстар аумағында шөп шабу ұйымдастырылды. Басқа өңірлерге уақытша 6 470 бас мал тасымалданды. Азық-түлік келісімшарт корпорациясы 637 тонна арзандатылған арпа жеткізді. Азық дайындауды жүзеге асыру үшін ҚР Үкіметінің резервінен 1,9 млрд.теңге бөлінеді.
Арал ауданына 1 мың тоннадан астам шөп және 40 тонна құнарлы жем жеткізілді. Азық-түлік келісімшарт корпорациясы 600 тонна арпа жеткізеді. 12 шабындық бригада құрылып, жем-шөп тасуға 127 автомашина жұмылдырылды. Көршілес Ақтөбе облысынан ірі жем-шөп жеткізу ұйымдастырылды.
Мал азығын дайындау және қамтамасыз ету мәселелері ауыл шаруашылығы министрлігі мен облыс әкімдіктерінің тұрақты бақылауында.