Қазақстанда соңғы бес жылда жұмыссыздар саны шамамен бір деңгейде сақталып отыр. Ұлттық статистика бюросының деректеріне сүйенсек, 2020 жылдан 2025 жылдың алғашқы тоқсанына дейін жұмыссыздық деңгейі 4,6–4,9% аралығында құбылып тұр. Бұл — салыстырмалы түрде тұрақты көрініс. Дегенмен деректерге тереңірек үңілсек, кейбір маңызды тенденциялар байқалады. Толығырақ Аqshamnews.kz тілшісі дайындаған материалдан біліңіз.
Әйелдер арасындағы жұмыссыздық ерлерден жоғары
Жыл сайын жұмыссыздардың ішінде әйелдердің үлесі ерлерден жоғары. Мәселен, 2025 жылдың алғашқы тоқсанында:
-
Әйелдер саны – 237,6 мың (жұмыссыздық деңгейі: 5,0%),
-
Ерлер саны – 213,9 мың (жұмыссыздық деңгейі: 4,3%).
Осыған дейін де бұл айырмашылық сақталып келген:
-
2024 жылы: әйелдер – 238,1 мың, ерлер – 211,7 мың.
-
2023 жылы: әйелдер – 243,1 мың, ерлер – 209,1 мың.
-
2022 жылы: әйелдер – 250,2 мың, ерлер – 208,1 мың.
Бұл нені білдіреді? Әйелдер, әсіресе бала күтімімен үйде отыратындар мен ауылдық жерлердегі әйелдер, еңбек нарығына қайта оралғанда қиындыққа тап болатынының көрінісі.
Жастар жұмыссыздығы қандай деңгейде?
Жастардың жұмыссыздық үлесі 2020 жылдан бері 3,1–3,8% деңгейінде сақталып отыр. Мысалы:
-
2020–2023 жж. аралығында жастар үлесі – 3,8%,
-
2024–2025 жж. — 3,1%.
Бұл — өсімі бар статистика сияқты көрінгенімен, жастардың көбі еңбек нарығына мүлде кірмей, оқуда немесе бейресми жұмыста болуы мүмкін екенін де ескерген жөн.
Жалпы жұмыссыздық өзгерісі
| Жыл | Жұмыссыздар саны | Деңгейі (%) |
|---|---|---|
| 2020 | 448,8 мың | 4,9% |
| 2021 | 449,6 мың | 4,9% |
| 2022 | 458,3 мың | 4,9% |
| 2023 | 452,2 мың | 4,7% |
| 2024 | 449,8 мың | 4,7% |
| 2025 (І тоқсан) | 451,5 мың | 4,6% |
Бес жыл ішінде жұмыссыздық деңгейі 4,6%–4,9% аралығында ғана өзгеріп, нақты төмендеу байқалмайды. Бұл еңбек нарығының жаңаруы баяу екенін көрсетеді.