Қазақстанда жылу энергетикасы саласындағы мамандықтарға қызығушылық қайта күшейіп отыр. Бұл туралы энергетика вице-министрі Сұңғат Есімханов Үкімет отырысының қорытындысы бойынша өткен баспасөз мәслихатында мәлімдеді.
Вице-министрдің айтуынша, биыл бұл салаға түскен түлектердің саны бұрын-соңды болмаған көрсеткішке жеткен.
«Біз соңғы екі жылда энергия өндіретін кәсіпорындардағы орташа жалақыны 420-450 мың теңгеге дейін көтердік. Соның нәтижесінде мамандардың кетуі тоқтады. Биылғы жылы Ғылым және жоғары білім министрлігімен бірлесіп гранттар санын ұлғайтып, алғаш рет Алматы энергетика және байланыс университетіне (АЭБУ) 200 студент түсті. Бұлай ешқашан болған емес. Сондықтан салаға мамандарды қайта тартуға мүмкіндік бар. Әрине, жақсы энергетикті бірнеше жыл баулу қажет. Бұл үрдіс біздің бақылауымызда болады, сондықтан кадрлық әлеуетті қалпына келтіру басталды деп айта аламыз», – деді ол.
Жылу энергетикасы — елдің энергетикалық қауіпсіздігі мен тұрақты дамуы үшін маңызды саланың бірі. Соңғы жылдары энергетикалық нысандарда жаңғырту жұмыстары жүргізіліп, жаңа қондырғылар енгізілуде. Бұл өз кезегінде білікті кадрларға деген сұранысты арттыруда.
Сарапшылардың айтуынша, энергетика саласындағы еңбекақының көтерілуі, әлеуметтік кепілдіктердің жақсаруы және мемлекеттік қолдау шаралары жас мамандардың қызығушылығын арттырып отыр.
Сонымен қатар, биылғы «Жұмысшы мамандықтары жылы» аясында техникалық бағыттағы гранттар көлемі айтарлықтай көбейіп, жылу энергетикасы саласына жаңа серпін бермек.
