Әуежай «Қорғас – Шығыс қақпасы» арнайы экономикалық аймағында салынады.
Құжатты Қазақстанға Германия канцлерінің ресми сапары барысында ҚР Көлік вице-министрі Талғат Ластаев пен SKYHANSA басқарушы серіктесі Юрген Грецбах қол қойды.
Қазақстан-неміс бірлескен жобасы үш кезеңде жүзеге асырылады деп күтілуде. Жалпы, жобаға 500 миллион доллардан астам жекеменшік инвестиция салынып, 300-ден астам тұрақты жұмыс орны құрылмақ.
«Жоба әуежай инфрақұрылымын үш кезеңде салуды, сағатына 500 адамға дейін қабылдай алатын жолаушылар терминалын, жылына 550 000 тонна отын сақтауға арналған қойманы, жылына 250 000 тоннаға дейін жүк өңдеуге арналған жүк терминалын салуды көздейді», – деп хабарлады Азаматтық авиация комитеті.
Халықаралық әуежай салумен қатар, жоба әуе кемелерін жөндеуге арналған авиациялық-техникалық орталықты құруды, сондай-ақ туристік және сауда-ойын-сауық қызметтерін дамытуды қамтиды.
Қазіргі уақытта Жетісу облысының әкімдігі әуежай құрылысына жер бөліп қойған. Инвестициялық келісім жасалғаннан кейін, инвестор жобаға кіріседі.