Қазақстанда электрондық цифрлық қолтаңба (ЭЦҚ) кілттерін қайта шығару тәртібі күшейтілді. Енді бұл процесс кезінде азаматтың жеке басын міндетті түрде қосымша растау талап етіледі, деп хабарлайды Aqshamnews.kz тілшісі.
«Ұлттық ақпараттық технологиялар» АҚ мәліметінше, жаңа талап азаматтардың жеке деректерін қорғау және алаяқтық әрекеттердің алдын алу мақсатында енгізілген. Қосымша қорғаныс тетігі рұқсатсыз қол жеткізу қаупін төмендетуге бағытталған.
Енді pki.gov.kz порталындағы жеке кабинет арқылы ЭЦҚ кілттерін қайта шығару кезінде жүйе пайдаланушыдан жеке басын екі тәсілдің бірімен растауды сұрайды. Атап айтқанда, бір реттік SMS-код Мобильді азаматтар базасында тіркелген телефон нөміріне жіберіледі немесе eGov Mobile қосымшасында көрсетілетін цифрлық код енгізілуі қажет. Бұл тетік ЭЦҚ кілттерін иесінің смартфонына қол жеткізусіз заңсыз пайдаланудан қорғауға мүмкіндік береді.
Жаңа талаптар әзірге шетелдік азаматтарға қолданылмайды. Себебі олардың телефон нөмірлері көп жағдайда Мобильді азаматтар базасына тіркелмеген.
Айта кетейік, бұған дейін алаяқтар алдау жолымен пайдаланушылардың жеке кабинеттеріне кіріп, ЭЦҚ кілттерін өз тасымалдағыштарына қайта шығару фактілері тіркелген болатын. Бұдан бөлек, үшінші тұлғаның ЭЦҚ-сын пайдаланған қазақстандықтарға айыппұл салынатыны туралы да хабарланған еді.