Қазақстан Республикасы Президентінің жанындағы Қазақстанның стратегиялық зерттеулер институтының тапсырысы бойынша «Демократия институты» ғылыми-зерттеу қоры 2024 жылдың 18 тамызы мен 17 қыркүйегі аралығында әлеуметтанулық зерттеу жүргізді. Сауалнамаға 18 жастан асқан 8 мың респондент қатысты, деп хабарлайды aqshamnews.kz
XXI ғасырда энергетика экономикалық тұрақтылыққа, экологияға және халықтың өмір сүру сапасына айтарлықтай ықпал ететін жаһандық даму факторы болып табылады. Қазақстан уран қоры бойынша әлемде алдыңғы қатарда бола отырып, электр қуаты тапшылығын шешу мақсатында атом электр станциясын салуды қарастырып отыр.
Сауалнама нәтижелері бойынша респонденттердің 59,2%-ы референдумға қатысуға дайын екенін білдірді. Оның 41,6%-ы нақты қатысатынын айтқан. Сонымен қатар, 20% әлі шешім қабылдамағанын, ал 17% референдумға қатыспайтынын мәлімдеген.
АЭС құрылысын қолдаушылардың саны айтарлықтай өсті: тамыз айындағы сауалнамада 53,1% қолдау көрсетсе, қыркүйекке қарай бұл көрсеткіш 60,2%-ға жеткен. Респонденттердің 24,9%-ы АЭС құрылысына қарсы екенін білдірген. Олар АЭС-ның адам денсаулығы мен қоршаған ортаға әсері туралы ақпаратқа ерекше мән берген.
Зерттеу жеке сұхбат (face-to-face) әдісімен жүргізілді. Сауалнамаға 17 облыс пен республикалық маңызы бар үш қала – Астана, Алматы, Шымкенттің 18 жастан асқан тұрғындары қатысты. Жалпы іріктеу көлемі 8000 респондентті құрады. Статистикалық қателік 2,9%-дан аспайды.
Бұл зерттеу атом электр станциясы құрылысына қатысты үкімет, сарапшылар мен халық арасындағы ашық диалогтың маңыздылығын көрсетіп отыр.