Сегіз мыңнан астам маман даярлап, 57 стартапқа қолдау көрсетті, деп хабарлайды aqshamnews.kz тілшісі.
Соңғы жылдары Қазақстан бақылаушы елден ТМД және Орталық Азия кеңістігіндегі блокчейн технологияларын дамытудың негізгі өңірлік орталығына айналды. Басты нәтиже — елде Web3-жобаларды дамытудың толыққанды инфрақұрылымы қалыптаса бастады: мамандарды оқытудан және командалар құрудан бастап, стартаптарды қаржыландыру мен олардың халықаралық нарыққа шығуына дейін. Бұл туралы Үкімет отырысында «Solana Superteam KZ» корпоративтік қорының басшысы Талғат Досанов мәлімдеді.
Оның айтуынша, Solana экожүйесімен бірлескен жұмыс барысында 8 мыңнан астам адам білім алды, оның ішінде 2 мыңнан астамы сертификат алды. Сертификат алған әрбір бесінші түлек мемлекеттік органның өкілі болып саналады. Оқыту Solana-дағы блокчейн және әзірлеу негіздерін, практикалық тапсырмаларды және командаларды халықаралық хакатондарға дайындауды қамтиды.
Технологиялық кәсіпкерлікті қолдау бағытында да елеулі нәтижелерге қол жеткізілді: 57 қазақстандық стартап жалпы сомасы 121 млн теңге грант алды. Еліміз Solana-ның жаһандық хакатондарына берілген өтінім саны бойынша әлемнің үздік 10 мемлекетінің қатарына кірді. Қазақстан халықаралық әзірлеушілер қауымдастығындағы позициясын да нығайтты.
Сонымен қатар Solana экожүйесі ресми түрде ұсынылған 25 елдің ішінде халықаралық Solana Summit сериясын бірінші болып Қазақстан ашты. Саммитке 30-дан астам елден 900-ден астам қатысушы жиналды. Іс-шара Solana-ның әлеуметтік желілері арқылы 4 млн адамдық аудиторияға таратылды.
Блокчейн-технологиялар негізінде қаржы инфрақұрылымы да дамуда. Solana қолдауымен KASE Global алаңында Қазақстандағы алғашқы ETF SOLZ_KZ жария блокчейнде іске қосылды. 2026 жылғы 11 маусымда Гонконгте Alatau City мен Solana Foundation арасында меморандумға қол қойылды.
Қазақстан – ТМД мен Орталық Азиядағы Solana-ның ресми өкілдігі бар жалғыз ел. Бұған үш фактордың үйлесімі мүмкіндік берді: елді технологиялық дамыту мен цифрландыруға бағытталған дәйекті мемлекеттік саясат, инвесторлар үшін айқын реттеу ортасы және айтарлықтай адами капитал.
Нәтижесінде елде білім беру, технологиялық кәсіпкерлік, халықаралық ынтымақтастық және реттелетін қаржы құралдарын біріктіретін Web3-ті дамытуға арналған кешенді экожүйе қалыптасуда.