Қазақстан Дүниежүзілік банктің статистикалық тиімділік көрсеткіштері (SPI) рейтингінде 217 елдің ішінде 44-орынға ие болды.
Бұл - өткен жылмен салыстырғанда бірден 21 позицияға жоғары нәтиже (2023 жылы – 65-орын), - деп хабарлайды Aqshamnews.kz.
Дүниежүзілік банк жыл сайын ресми түрде танылған халықаралық дереккөздер негізінде ұлттық, өңірлік және жаһандық статистикалық жүйелердің тиімділігін бағалайтын SPI рейтингін жариялайды. Бұл көрсеткіш елдердің өзекті және сапалы мәліметтерді жинау, өңдеу және жариялау деңгейін анықтайды. Бағалау шкаласы 0-ден 100 балға дейін жүргізіледі.
Өткен жылдың қорытындысы бойынша, Қазақстанның ұлттық статистика жүйесі 84,9 балл жинады. Көрсеткіштің өсуіне мына бағыттардағы айтарлықтай ілгерілеу әсер еткен:
– «Деректерді пайдалану» – +10 балл
– «Дерек көздері» – +10,2 балл
– «Деректер инфрақұрылымы» – +10 балл
– «Деректерді ұсыну қызметтері» – +1,1 балл
SPI-2024 көшбасшылары - Норвегия, Швеция және Канада.
