Қазақстан Республикасы Сыртқы істер министрінің орынбасары Ермұхамбет Қонысбаев Халықаралық Аралды құтқару қоры (ХАҚҚ) Атқарушы комитетінің төрағасы Асхат Оразбаймен кездесу өткізді.
Кездесу барысында тараптар Қазақстан төрағалығының бірінші жылының қорытындыларын, Атқарушы комитетінің жұмысын, сондай-ақ Ұйымның күн тәртібіндегі өзекті мәселелерді талқылады.
Арал теңізі бассейні елдерінің өңірлік дамуының су шаруашылығы, су-энергетикалық және экологиялық аспектілерін реттеудегі Қордың маңызды рөлі аталып өтті.
Тараптар 2023 жылғы қыркүйекте Душанбеде өткен ХАҚҚ Саммитінің қорытындысы бойынша мемлекет басшылары қойған міндеттер мен тапсырмаларды шешу, Ұйымды жетілдіру процессін тез арада аяқтауға жәрдемдесу үшін барлық күш-жігерін жұмсауды жалғастыруға, сондай-ақ белсенді өзара іс-қимыл жасауға келісті.
Атқарушы комитетінің төрағасы өз кезегінде Қазақстанның төрағалық ету басымдықтарын ілгерілету, өңірлік экологиялық жобалар мен бағдарламаларды іске асыру, сондай-ақ ХАҚҚ-тың халықаралық байланыстарын кеңейту барысы туралы хабардар етті.