2025 жылғы 20 ақпан мен 2 наурыз аралығында Алматы қаласында орналасқан ADD Арена спорт кешенінде (Нұркент шағын ауданы, 14Б) Қазақстан Республикасының жасөспірімдер мен жастар арасындағы U17 және U20 санатындағы грек-рим, еркін және әйелдер күресі бойынша чемпионат өтеді, деп хабарлайды aqshamnews.kz
Аталған біріншілікке еліміздің 17 облысынан, сондай-ақ Астана, Алматы және Шымкент қалаларынан ең үздік жас балуандар қатысады. Олар Қазақстан чемпионы атағы үшін және биылғы күнтізбелік жылға жоспарланған халықаралық жарыстарда – Азия және әлем чемпионаттарында ұлттық құрама сапында ел намысын қорғау мүмкіндігі үшін күреседі.
20 ақпанда сағат 16:30-да U17 және U20 жас санаттарындағы грек-рим, еркін және әйелдер күресі бойынша Қазақстан Республикасының чемпионатының салтанатты ашылу рәсімі өтеді. Бұл шараға еліміздің даңқты балуандары – Олимпиада ойындарының жүлдегерлері, әлем және Азия чемпиондары қатысып, күрес спортының үш стилінің дамуына қосқан үлестерін атап өтеді.
Турнирдің маңыздылығы жайлы Алматы қаласының күрес федерациясының президенті Омар Алиев:
"Қазақстан Республикасының грек-рим, еркін және әйелдер күресі федерациясының басшылығына осындай ауқымды жарысты өткізуге сенім білдіріп, Алматыда ұйымдастыру мүмкіндігін бергені үшін алғысымды білдіремін. Бұл жарыс – еліміздегі ресми жарыстар күнтізбесінің ашылуы іспеттес. Сонымен қатар, Алматы қаласының Спорт басқармасына турнирді ұйымдастырудағы қолдауы үшін ерекше алғыс айтқым келеді. Алматыда күрес спортын дамытуда оң өзгерістер болды, бұл чемпионат жас балуандарымызға өз шеберліктерін жоғары деңгейде көрсетуге тамаша мүмкіндік береді."