Көлік министрлігі ғимаратында халықаралық автомобиль тасымалдары жөнінде Казақстан-Польша аралас комиссиясының кезекті отырысы өтті.
Тараптар Қазақстан мен Польша арасындағы жүк тасымалдарының көлемі туралы ақпарат алмасып, екі ел арасында автомобиль көлігімен жүк тасымалы көлемі ұлғайғанын атап өтті, деп хабарлайды aqshamnews.kz.
Көлік министрлігінің мәліметінше, 2024 жылдың қорытындысы бойынша екі мемлекет арасында автомобиль көлігімен жүк тасымалдары көлемі 5%-ға өсіп, жалпы көрсеткіш 360 мың тонна жүкті құрады.
Келіссөз барысында екі жақ ынтымақтастықты одан әрі дамыту мәселелерін талқылады. Мәселен, шетелдік рұқсат беру бланкілерін электрондық форматқа ауыстыру және 2025 жылға арналған шетелдік бланкінің нақты квотасы бекітілді.
Кездесуді қорытындылай келе екі ел мамандары бірлескен жұмыстың маңызын атап өтіп, автомобиль көлігі саласында ынтымақтастықты одан әрі нығайтатындарын айтты. Отырыс қорытындысы бойынша арнайы хаттамаға қол қойылды.