Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Біріккен Араб Әмірліктерінің Қазақстандағы Елшісі Мұхаммед Әл-Арикимен кездесу өткізді.
Тараптар Қазақстан мен Әмірліктердің арасындағы ынтымақтастықтың негізгі мәселелерін, атап айтқанда сауда-экономикалық және инвестициялық байланыстардың қарқынды дамуын талқылады, деп хабарлайды aqshamnews.kz Cыртқы істер министрлігіне сілтеме жасап.
СІМ басшысы БАӘ еліміздің Таяу Шығыстағы негізгі серіктестерінің бірі екенін және мемлекет басшылары арасындағы сенімді диалогты атап өтті.
Тараптар ҚР Президенті Қасым-Жомарт Тоқаевтың «Әбу Дабидің орнықты даму апталығына» қатысу үшін БАӘ-ге жақында жасаған жұмыс сапарының қорытындыларын оң бағалады.
Сұхбат барысында екіжақты тауар айналымын ұлғайту және көлік-логистикалық ынтымақтастықты кеңейту үшін жаңа жолдарды іздеудің маңыздылығына ерекше назар аударылды. Бұл тұрғыда елдер арасындағы жолаушылар ағынының артуы және туристік сапарлар санының өсуі қанағаттанушылықпен аталып өтті.
Сонымен қатар сұхбаттастар жаһандық күн тәртібін талқылап, халықаралық ұйымдар аясында белсенді жұмысты жалғастыруға келісті.