Шайбалы хоккейден ӘЧ: Қазақстан құрамасы бүгін Канадамен кездеседі
Шайбалы хоккейден 2023 жылғы әлем чемпионатының элиталық дивизионында бүгін, 17 мамырда, Қазақстан құрамасы Канадамен кездеседі, деп хабарлайды Almaty-akshamy.kz ҚазАқпаратқа сілтеме жасап.
Аталған ойын елорда уақытымен 23:20-да басталып, Qazsport телеарнасынан тікелей эфирде көрсетіледі.
В тобында сынға түсіп жатқан қазақстандық хоккейшілер бұған дейін буллиттен Норвегияны 4:3 есебімен жеңді.
Одан кейін Чехиядан 1:5, Швейцариядан 0:5 есебімен жеңіліп қалды.
Ал Канада биыл Латвияны 6:0, Словенияны 5:2 есебімен тізе бүктірсе, Словакиядан буллиттен 2:1 есебімен басым түсті.
Екі құрама бұған дейін төрт мәрте кездесті. Барлық ойында Канада құрамасының мерейі үстем болды.
Әлемде Канада елі шайбалы хоккейдің отаны саналады. Қазірге дейін қылқан жапырақты елдің өкілдері 27 мәрте жеңіс тұғырына көтерілген.
Дүбірлі додада 2021 жылы чемпион атанса, 2022 жылы күміс медаль иегері болды.
Аталған құрама хоккейшілерінің бірқатары өз елінің біріншілігіндегі клубтарда ойын көрсетеді. Сондай-ақ, АҚШ, Германия, Ресей, Финляндия, Швейцария, Швеция клубтарында ойнайтын хоккейшілер бар.
Сондай-ақ, бүгін В тобында Латвия - Норвегия шеберлік байқасады.
Ал А тобында АҚШ - Австрия, Финляндия - Франция ойнайды.
Айта кетсек, әлем чемпионаты 12 мамырдан Латвияның Рига және Финляндияның Тампере қалаларында басталды.
Топтық кезең 12 және 23 мамыр аралығына белгіленген. Финал 28 мамырда болады.