Алматы қаласының әкімдігі Қазақстан халқы тілдері күні мен Ахмет Байтұрсынұлының туған күніне орай «Ана тілім – ардағым» атты мерекелік іс-шара өткізді.
Орталық демалыс саябағында өткен мерекеге ақындар мен жазушылар, өнер қайраткерлері, еңбек ардагерлері, саяси партиялар мен үкіметтік емес ұйымдардың өкілдері, қала тұрғындары мен қонақтары, студенттер мен оқушылар қатысты.
- Қазақстан халқы тілдері күні мерекесі 2018 жылдан бері ұлтымыздың ұстазы Ахмет Байтұрсынұлының туған күніне орай тойланады. Алматыда А.Байтұрсынұлы ескерткішіне гүл шоқтары қойылды. Орталық демалыс саябағында мерекелік іс-шара ұйымдастырылды. Кеште эстрада жұлдыздары өнер көрсетіп, көрермендерге сұрақ-жауап түрінде ойындар өткізілді. “Жаңа ғасыр” театры қойылым қойды, - деді Алматы қаласы әкімінің аппараты Тілдерді дамыту және ономастика бөлімінің басшысы Бақыт Қалымбет.
Сондай-ақ мерекелік кеш аясында Алматы қаласында мемлекеттік тіл саясатын жүзеге асыруға атсалысып жүрген мемлекеттік қызметкерлер мен қоғам белсенділері Ғылым және жоғары білім министрінің алғыс хатымен марапатталды.
- Біз екі жарым жылдан бері қазақ тілін үйретіп, қазақ тілді ортаны қалыптастырып келеміз. 4 айлық курстарымыз бар, аптасына 3 рет сабақ өтеді. Бүгінге дейін 100-ден астам адам келді. Бұл курстарға кез келген адам тегін қатыса алады, - деді “Батыл бол” клубының негізін қалаушы Алексей Сколозубов.