Қазақстан Франциямен визалық рәсімдерді жеңілдету мәселесі бойынша келіссөздер жүргізіп жатыр, келесі айда (ақпанда) екінші раунд өтеді, деп хабарлайды Aqshamnews.kz тілшісі.
2026 жылғы 22 қаңтарда Сенат Қазақстан мен Франция арасындағы заңсыз мигранттарды өз еліне қайтару (реадмиссия) жөніндегі келісімді мақұлдады.
Талқылау кезінде депутат Сергей Ершов бұл құжат визалық режимді жеңілдетуге әсер ете ме деген сұрақ көтерді. Сыртқы істер министрінің орынбасары Әлібек Бақаев визаны жеңілдету бойынша процедура басталғанын айтып, ақпанда екінші раунд келіссөз өтетінін мәлімдеді.
Оның сөзінше, ЕО бағытындағы жұмыс екі блокқа бөлінеді: бірі — реадмиссия, екіншісі — визалық рәсімдерді жеңілдету.
Реадмиссия — мемлекеттердің заңсыз жүрген азаматтарды/шетелдіктерді қабылдап алу тәртібін реттейтін келісімдер жүйесі. Айта кетейік, бұған дейін Қазақстан мен Еуропалық одақ визаны жеңілдету бойынша келіссөздерді бастап, келесі кезеңнің 2026 жылғы ақпанда өтетінін хабарлаған.
