2025 жылдың қорытындысы бойынша Қазақстан балмұздақ экспорты көлемі жөнінен тарихи көрсеткішке қол жеткізді, – деп хабарлайды aqshamnews.kz.
Ауыл шаруашылығы министрлігінің мәліметінше, жыл ішінде сыртқы нарыққа 14 167 тонна өнім жөнелтілсе, импорт көлемі 12 194 тоннаны құрады. Осылайша, ел тарихында алғаш рет экспорт импорттан асты
Мамандардың айтуынша, бұл – саланың жүйелі дамуы мен отандық өндірушілердің халықаралық нарықтағы бәсекеге қабілеттілігінің артуының нәтижесі.
«Шин-Лайн» компаниясының вице-президенті Омарбек Жұлдыздың айтуынша, мұндай жетістік ұзақ жылдарға жоспарланған жаңғырту мен экспортты кеңейту стратегиясының жемісі. Егер 2005 жылы Қазақстан небәрі 12 тонна балмұздақ экспорттап, 12 мың тонна импорттаған болса, бүгінде жағдай түбегейлі өзгерді. Қазір қазақстандық өнім 10 елге экспортталады.
Саладағы серпіліске өндірісті жаңарту, заманауи технологияларды енгізу және мемлекеттік қолдау шаралары оң әсерін тигізді. Сонымен қатар экспорттық түсімнің артуы мен орташа бағаның өсуі қазақстандық балмұздақтың сапа мен брендтік құндылыққа басымдық бере бастағанын аңғартады.