Қазақстан 2029 жылы Астанада Азия-Тынық мұхиты ревматологтар қауымдастықтары лигасының (APLAR) 31-ші Конгресін қабылдайды, деп хабарлайды aqshamnews.kz.
Шешім Жапонияның Фукуока қаласында өткен APLAR Бас ассамблеясында қабылданды. Дауыс беруде Қазақ ревматологтар колледжі Үндістан қауымдастығын жеңіп шықты.
Бұл тарихи жетістікке қоса, ҚР Денсаулық сақтау министрлігінің бас штаттан тыс ревматологы, профессор Ғалымжан Тоғызбаев APLAR вице-президенті болып сайланды. Бұл – Қазақстан мен Орталық Азиядан шыққан маманның халықаралық ұйымдағы тұңғыш жоғары лауазымы.
Конгресс аясында елордаға әлемнің түкпір-түкпірінен 3000-нан астам маман келмек. Іс-шара Қазақстанның аймақтағы медициналық ғылым орталығы ретіндегі беделін арттырып, халықаралық ынтымақтастықты күшейтеді.
Анықтама: APLAR 1963 жылы құрылған, бүгінде оған Азия мен Океанияның 35 ұлттық қауымдастығы кіреді.