Өскемендегі Қажымұқан Мұңайтпасов атындағы жекпе-жек сарайында Ұлттық ұлан Бас қолбасшысының кубогы үшін қазақша күрестен жеке және командалық чемпионат өтті, деп хабарлайды аlmaty-akshamy.kz Ұлттық ұланның баспасөз қызметіне сілтеме жасап
Жарыс 1995 жылғы 7 сәуірде тәжік-ауған шекарасында қаза тапқан Қазақстан ІІМ Ішкі әскерінің 17 жауынгерін еске алуға арналды.
Чемпионатқа қатысушылар алдымен тәжік-ауған шекарасында қаза тапқан жауынгерлерді бір минут үнсіздікпен еске алды.
«Шығыс» өңірлік қолбасшылығының қолбасшысы, генерал-майор Арман Жұмағалиев ұлттық спортты ұлықтау маңызды екенін атап өтті.
-Президент Қасым-Жомарт Тоқаев Қазақстан халқына Жолдауында салауатты өмір салтын және бұқаралық спортты оның ішінде ұлттық спорт түрлерін дамытуды насихаттау мемлекеттің маңызды міндеті екенін айтты. Қазақ күресі – әскери қызметшілердің денесін ширатып, ептілікке баулитын ұлттық спорт түрі. Күрес жігіттеріміздің рухын көтеріп, төзімін шындайды, шыдамды болуға тәрбиелейді. Мұның бәрі әскери қызметшілерімізге жүктелген тапсырмаларды орындауда зор пайдасын тигізеді, - деді ол.
Чемпионатқа 7 команда қатысты. Олар – «Шығыс», «Оңтүстік», «Орталық», «Батыс» өңірлік қолбасшылықтарының, Ұлттық ұлан академиясының және тікелей бағыныстағы №6654 әскери бөлімі мен №5573 бригадасының құрама командалары.
Ұлттық ұлан Бас қолбасшылығы Дене даярлығы және спорт бөлімінің басшысы Сәтжан Әбішев жарыстың деңгейі жоғары екенін атап өтті.
-Мұнда республикалық деңгейде бақ сынап жүрген спортшы сарбаздарымыз да қатысып жатыр. Биыл ұлттық спорт түрін дамыту үшін Ішкі істер министрі мен оның орынбасары әрі Ұлттық ұланның бас қолбасшысы генерал-лейтенант Еркін Ботақановтың қолдауымен алғаш рет осындай чемпионат өткізіліп отыр. Бүгінгі біздің біріншілік іріктеу есебінде болады, - деді полковник.
Оның айтуынша, осы чемпионатта жеңіске жеткендер 1-3 сәуір аралығында Щучинскте өтетін Ішкі істер министрінің кубогында Ұлттық ұланның намысын қорғайды.
- 21-23 мамыр аралығында Қызылордада ҰҚК кубогы ұйымдастырылады. Топ жарған сарбаздар биыл шілдеде Астанада өтетін «Қазақстан барысы» сайысына да қатыса алады, - деді полковник Сәтжан Әбішев.
Жарыстың қорытындысы бойынша командалық есепте бас жүлдені астаналық №5573 бригадасының құрамасы жеңіп алса, екінші орынды «Батыс» өңірлік қолбасшылығының құрама командасы иеленді. Үшінші орын "Орталық" өңірлік қолбасшылығының құрамасына бұйырды.