Алматыда Дүниежүзілік Азаматтық қорғаныс күніне орай көрме ұйымдастырылды, деп хабарлайды aqshamnews.kz
Дүниежүзілік Азаматтық қорғаныс күніне арналған іс-шаралар аясында Алматы қаласының Төтенше жағдайлар департаменті Алматы қаласының құтқару қызметімен және ҚР ТЖМ аумақтық бөлімшелерімен бірге «Астана» алаңында өрт сөндіру, құтқару және басқа да арнайы құрал-жабдықтардың көрмесін өткізді.
Көрмеге келген алматылықтар қаланың авариялық-құтқару күштерінің мүмкіндіктерімен, құтқару және медициналық техника мен жабдықтарымен танысты. Сондай-ақ алаңда медицина қызметкерлері мастер-класс өткізіп, ашық түрде дене жарақаттары бар адамдарға қалай көмек көрсетілетінін көрсетті.
- Демонстрациялық көрме - азаматтық қорғау және қауіпсіздік мәдениетін қалыптастыру саласындағы білімді насихаттау мақсатында ұйымдастырылады, сондай-ақ қала тұрғындарын құтқару қызметтері мен құралымдардың мүмкіндіктерімен таныстыру үшін өткізіледі, - деді көрме ұйымдастырушылары.
Алаңда жер сілкіністерінің симуляторы қойылды. Бұл құрылғы жер сілкінісінің көлденең және тік дүмпулерін ұқсататын үй бөлмесінің макетінде көрсетілген. Оған қоса, қала тұрғындары мен қонақтары 90 метр биіктіктен адамдарды құтқаруға арналған Қазақстандағы ең биік көтергішті тамашалай алды.
Айта кетейік, Халықаралық азаматтық қорғаныс ұйымы (ХАҚҰ) Бас Ассамблеясының шешімімен 1990 жылдан бастап 1 наурыз күні Дүниежүзілік Азаматтық қорғаныс күні болып атап өтеді. Қазақстан Республикасы 1996 жылы ХАҚҰ мүшелігіне кіріп, халықты, аумақты және шаруашылық жүргізу объектілерді табиғи және техногендік сипаттағы төтенше жағдайлардан қорғау мәселелерін шешу бойынша халықаралық деңгейде белсенді ынтымақтастықты жүзеге асырады.