Алматы сән және қызмет көрсету саласы колледжінде қаладағы балалар колониясының қызметкерлері «Жасөспірімдердің қылмыстық жауапкершілігі» деген тақырыпта кездесу өткізді, деп хабарлайды aqshamnews.kz
Оған Алматы қаласы Қылмыстық-атқару жүйесі департаментіне қарасты №11 мекеменің қызметкерлері – режим және күзет бөлімінің бастығы әділет майоры Азамат Қанафин Азамат, мекеме бастығының кезекші көмекшісі әділет майоры Анар Мұстафаев, режим және күзет бөлімінің бақылаушысы әділет сержанты Молдабек Азамат қатысты. Кездесу барысында түзеу мекемесінің қызметкерлері жеткіншектерге еліміздегі заңдар туралы, олардың артықшылықтары, құқықтық жауапкершілік жайында әңгіме өрбітті. Құқық саласының мамандары студенттер қойған сұрақтарға жауап берді.
Кездесудің мақсаты – жастардың құқықтық білімін тексере отырып, оларға заң алдындағы жауапкершілігін түсіндіру, сауатын арттыру, қылмыстық жауапкершілік туралы түсінік беру.
– Біздің түзеу мекемесінде бас бостандығынан айырылған жасөспірімдер жазасын өтеп жатыр. Көпшілігінің құқықтық сауаты төмен. Ондай балалар жамандыққа тез ұрынып қалады. Біз өскелең ұрпақтың Ата заңымызды, өзге де құқықтық-нормативтік актілерді бұлжытпай орындап, құрметтей білгенін қалаймыз. «Тәртіпке бағынған құл болмайды». Біз жасөспірімдердің қауіпсіз ортаны өздері де қалыптастыра алатынын түсіндіргіміз келеді, – дейді №11 мекеме бастығының кезекші көмекшісі әділет майоры Анар Мұстафаев.