Мемлекет басшысы Қасым-Жомарт Тоқаев Қазақстан халқы Ассамблеясының (ҚХА) ХХХІV сессиясында сөйлеген сөзінде ұйымның ел ішіндегі тұрақтылық пен келісімді нығайтудағы тарихи рөлін ерекше атап өтті. Бұл туралы Aqshamnews.kz сайты хабарлайды.
Президент өз сөзін Қазақстан халқы Ассамблеясының 30 жылдығымен құттықтаудан бастады. "Бүгінгі басқосудың тарихи мән-маңызы айрықша. Биыл Қазақстан халқы Ассамблеясының құрылғанына 30 жыл толып отыр. Баршаңызға құтты болсын!" – деді Мемлекет басшысы.
Тоқаев Ассамблеяның үш онжылдықтағы еңбегі елдегі бейбітшілік пен қоғамдық келісімнің іргетасын қалап, тұрақты даму жолында маңызды рөл атқарғанын айтты. Оның пікірінше, ҚХА – этносаралық келісімнің бірегей үлгісі ретінде әлемде теңдесі жоқ құрылым.
Президент Ассамблеяның еліміздегі түрлі этностар арасындағы өзара құрмет пен түсіністікті нығайтуға қосқан үлесіне жоғары баға берді.
"Ассамблея қоғамдағы тұрақтылық пен келісімді нығайтуға өлшеусіз үлес қосты. Еліміздегі бірлік пен теңдіктің, тұрақтылық пен тыныштықтың символына айналды", – деді Тоқаев.
Сондай-ақ ҚХА-ның этносаралық қатынастар саласында қоғамдық институт ретінде маңызы артқанын, оның арқасында Қазақстанда бейбіт өмір сүрудің үлгісі қалыптасқанын атап өтті.
Мемлекет басшысы Ассамблеяның қоғамдық ұйымдармен және мемлекеттік институттармен тығыз байланыста жұмыс істейтінін, сондай-ақ ішкі саясаттың жүзеге асуына белсенді түрде атсалысып жатқанын айтты.
"Ассамблея мемлекет пен қоғам арасында сындарлы әрі жемісті диалог орнатуға ықпал етуде", – деп нақтылады ол. ҚХА-ның 12 мүшесі қазіргі уақытта Ұлттық құрылтай құрамында еңбек етіп, елдік маңызы бар бастамаларға атсалысып жатқанын да атап өтті.