Алматы қаласының авиациялық көлік прокуратурасының үйлестіруімен Қазақстанның мемлекеттік шекарасы арқылы ірі көлемде препараттарды заңсыз өткізу фактісі анықталды, деп хабарлайды aqshamnews.kz.
Бір топ адам алдын ала сөз байласып, құрамында адам өмірі мен денсаулығына қауіпті заттар бар анаболиктер мен стероидтерді (ҚР Денсаулық сақтау министрінің 2023 жылғы 26 маусымдағы № 120 бұйрығы) витаминдер ретінде жасырып, Қазақстанның мемлекеттік шекарасы арқылы АҚШ пен Еуропа елдеріне жөнелтуді жоспарлаған.
Жедел-іздестіру іс-шаралары барысында ұйымдастырушылардың препараттарды сақтап, буып-түюмен айналысқан мекенжайы табылды.
Тексеру нәтижесінде 206 мыңға жуық ампула мен таблетка, шприцтер, желімдеуге арналған станок, пошта конверттері, сонымен қатар құтыларға арналған өздігінен жабысатын жапсырмалар тәркіленді. Аталған азаматтар ұсталып, оларға қатысты сот "үй қамағына алу" бұлтартпау шарасын қолданды.
Қазіргі уақытта сотқа дейінгі тергеу жүргізілуде. ҚР ҚПК-нің 201-бабына сәйкес өзге мәліметтер жария етілмейді.