Қарағанды облысында әкесінің пәтерінде қарасора өсірген тұрғын анықталды, – деп хабарлайды aqshamnews.kz тілшісі Polisia.kz-ке сілтеме жасап.
Қарағанды облысында полицейлер 70 жастағы зейнеткердің пәтерінен заңсыз ұйымдастырылған қарасора өсіру орнын әшкереледі. Тінту барысында үй жағдайында арнайы жабдықтармен өсірілген қарасора бұталары табылды. Алдын ала мәліметтерге сәйкес, бұл өсімдіктер пәтер иесінің 33 жастағы ұлына тиесілі.
Оның айтуынша, ол күз мезгілінде қарасора тұқымдарын әкеліп, әкесінің пәтерінде шағын жылыжай ұйымдастырған. Тәртіп сақшылары қарасора өсірілген құмыраларды, өсімдіктерге қажет микроклиматты қамтамасыз ететін құрал-жабдықтарды, сондай-ақ қағазға оралған кептірілген өсімдіктерді заттай дәлел ретінде тәркіледі. Зейнеткердің ұлы тұқымдардың өзіне тиесілі екенін растады. Оның мәлімдеуінше, қарасораны жеке пайдалану мақсатында өсірген.
Сондай-ақ, күдікті есірткі заттарын біршама уақыт бойы тұтынып жүргенін мойындады. Бұл дерек бойынша қылмыстық іс қозғалды. Қазір күдіктінің есірткі заттарын медициналық емес мақсатта тұтыну дерегін анықтау үшін тиісті сараптамалар тағайындалды. Сараптама нәтижесіне сәйкес, заң аясында тиісті шешім қабылданады.
Тергеу амалдары жалғасып жатыр.