Мемлекет басшысы Қазақстан Республикасының Қылмыстық заңнамасын оңтайландыру мәселелері бойынша кейбір заңнамалық актілерге өзгерістер мен толықтырулар енгізу туралы Заңға қол қойды.
Жаңа нормаларға сәйкес, енді қалыңдық ұрлау – яғни, некеге тұру мақсатында адамды еркінен тыс алып қашу – ауыр қылмыс ретінде қарастырылады және 10 жылға дейін бас бостандығынан айыру жазасы көзделеді, деп хабарлайды aqshamnews.kz.
Қылмыстың ауырлығына қарай үш деңгейлі жаза қарастырылған:
• 1-бөлік – зорлық-зомбылықсыз алып қашу: 2000 АЕК-ке дейін айыппұл (~7,8 млн теңге), түзеу жұмыстары немесе 2 жылға дейін бас бостандығынан айыру;
• 2-бөлік – күш қолдану немесе қорқыту арқылы алып қашу: 5000 АЕК-ке дейін айыппұл (~19,6 млн теңге), 3 жылдан 7 жылға дейін бас бостандығынан айыру;
• 3-бөлік – денсаулыққа ауыр зиян келтіру немесе өлімге әкелген жағдайлар: 5 жылдан 10 жылға дейін бас бостандығынан айыру.
Сонымен қатар:
• Некеге мәжбүрлеу үшін қылмыстық жауапкершілік енгізілді — күш қолдану, материалдық тәуелділік немесе қызметтік өкілеттікті пайдалану арқылы;
• Сталкинг – адамды заңсыз қудалау мен бақылау – үшін де жаза белгіленді;
• ҚР ҚК 125-бабындағы ескертпе алынып тасталды: енді жәбірленушіні өз еркімен босатқан адам да қылмыстық жауапкершіліктен босатылмайды.
Бұл өзгерістер Қазақстанда мәжбүрлі некенің алдын алу, әйелдер мен балалардың құқықтарын қорғау мақсатында қабылданды және қоғамда зорлық-зомбылықтың кез келген түріне «нөлдік төзімділік» қағидатын орнықтыруға бағытталған.