Ұлттық құрылтайдағы ойлар мен ұсыныстар
Қазақстан Жазушылар одағында өткен шығармашылық қауым өкілдерінің басқосуында Мемлекет басшысы Қасым-Жомарт Тоқаевтың қатысуымен Бурабайда ұйымдастырылған Ұлттық құрылтайдың төртінші отырысында көтерілген мәселелер кеңінен талқыланды. Қоғамды толғандырып отырған рухани, мәдени және әлеуметтік тақырыптар төңірегіндегі пікірлер қаламгерлер тарапынан қолдау тауып, маңызды ұсыныстар айтылды. Бұл туралы Aqshamnews.kz сайты хабарлайды.
Ұлттық құрылтай – жаңғыру мен жаңару алаңы
Жиынды ашқан Қазақстан Жазушылар одағы Басқармасының төрағасы Мереке Құлкенов Құрылтайдың бұл жолғы отырысында азаматтық қоғам, мәдениет, білім, ғылым және әлеуметтік даму сынды салалардағы жүйелі өзгерістерге негіз болатын мәселелер көтерілгенін айтты. Ол Мемлекет басшысының сөйлеген сөзін бағдарламалық маңызға ие деп бағалап, Президент ұсынған басым бағыттар елдің рухани жаңғыруымен тығыз байланысты екенін атап өтті.
"Құрылтай – тек пікір алмасу алаңы ғана емес, бұл – елдік мәселелерді шешудің, жаңғырудың және жаңарудың нақты жолы", – деді Мереке Құлкенов.
Құрылтайда айтылған ұсыныстардың мемлекет деңгейінде қолдау табуы, әсіресе ономастика саласын жетілдіру, әлеуметтік кеселдермен күрес, азаматтық қоғамды дамыту, қоғамдық сана мен құндылықтарды жаңғырту сынды бағыттардың өзектілігіне тоқталды.
Қаламгерлердің пікірлері: ұлттық құндылықтарды сақтау – басты міндет
Жиында сөз алған жазушылар мен әдебиеттанушылар – Кәдірбек Сегізбаев, Қуандық Түменбай, Жүсіпбек Қорғасбек, Құдияр Біләл, Бақытжан Қанапиянов, Алмас Ахметбек, сондай-ақ сыншылар Қансейіт Әбдезұлы мен Әлия Бөпежанова елдің рухани дамуында қаламгерлердің орны ерекше екенін атап өтті.
Олар қоғамда жиі кездесетін алаяқтық әрекеттер, теріс діни ағымдар, ұлттық болмысқа жат идеологиялар сияқты кері құбылыстарға қарсы күресте шығармашылық қауымның белсенді болуы тиіс екенін жеткізді. Сонымен қатар, отандық кино мен анимация өндірісіне идеологиялық тұрғыдан сапалы мазмұн енгізудің маңыздылығы айтылды.
Президент сөзі – бағыт беруші құжат
Қаламгерлер Қасым-Жомарт Тоқаевтың:
«Біз баршаға және әркімге зор мүмкіндік беретін мемлекет құрып жатырмыз. Бұл – әр азамат өз қабілетін шыңдап, адал еңбегімен отбасын асырай алатын ел болу деген сөз. Заң және тәртіп – біздің мызғымас тұғырымыз. Ал біздің идеологиямыз – жаһандағы аса күрделі геосаяси ахуалда елімізді жаңа даму деңгейіне көтеру үшін берік негіз қалау» деген сөзін ерекше мәнмен қабылдады.
Бұл мәлімдеме ел дамуының жаңа кезеңіне серпін беретін негізгі ұстаным ретінде бағаланып, әділетті әрі қауіпсіз қоғам құру жолында барлық азаматтардың белсенді рөл атқаруы қажеттігін көрсетті.
Қаламгерлер мен шығармашылық интеллигенция өкілдерінің ой-пікірі ел болашағы үшін маңызды идеологиялық, мәдени, әлеуметтік мәселелерді көтеріп, ұлттық құндылықтарды сақтап, жаңғыртуға бағытталған нақты ұсыныстармен толықты. Ұлттық құрылтайда айтылған идеялар мен бастамалар – жаңа Қазақстанды қалыптастыру жолындағы нақты қадамдардың көрінісі.