Алматының Қала күніне орай Мультимедиялық дәстүрлі музыка орталығында «Алматы – арман қала» атты концерт өтті.
Сахнаға Жүргенов атындағы Қазақ ұлттық өнер академиясының студенттері шығып, халық әндері мен аспаптық туындылар орындады, деп хабарлайды Aqshamnews.kz.
«Қала күніне біз әрқашан ерекше бағдарлама әзірлеуге тырысамыз. Мұндай концерттер жас таланттарға өзін танытуға мүмкіндік беріп, көрерменді ұлттық өнерге баурайды», – деді орталық жетекшісі Руза Қаженова.
Өнер академиясының студенті Гүлім Измағаниева әсерін жасырмады:
– Қала күні – менің ең сүйікті мерекелерімнің бірі. Бүгін халық әндерін орындап, көрермен алдында өнер көрсеткеніме қуаныштымын. Бұл әндер маған ерекше жылылық сыйлайды.
Көрермен әр нөмірді ыстық ықыласпен қабылдады. Ал ұйымдастырушылардың айтуынша, орталықта мұндай концерттер тұрақты түрде өткізіліп, мектеп оқушылары мен студенттердің ұлттық мәдениетпен жақын танысуына мүмкіндік береді.
