Жас өнерпаздардың музыкалық кешін халық айрықша ықыласпен қабыл алды, деп хабарлайды aqshamnews.kz тілшісі.
Қала күні құрметіне Алматы қаласы әкімдігінің мәдениет басқармасы «Әнім сенсің, Алматы!» атты дәстүрлі музыканы насихаттап жүрген жастардың концертін өткізді.
Халқымыздың осы күнге толымды жеткен ғажап өнерінің бірі дәстүрлі әнін жанына серік етіп, дәріптеп жүрген жас өнерпаздардың музыкалық кешін халық айрықша ықыласпен қабыл алды.
Ұлтымыздың алтын арқауындай әсем ән әуелеген концертке қаламыздағы дәстүрлі музыкаға тәрбиелейтін оқу орындары Құрманғазы атындағы Қазақ ұлттық консерваториясы, Темірбек Жүргенов атындағы Қазақ ұлттық өнер академиясы, Жүсіпбек Елебеков атындағы республикалық эстрада-цирк колледжінде тәлім алып жүрген Ысрайыл Аида, Сағындық Аружан, Мизамбаев Райымбек, Өмірғалы Мадияр, Сұлтанғалиева Ғалия, Ақылбек Балжан, Жұмамұрат Кішкене, Касимова Аяжан, Аманғазин Сәулет, Социал Ердаулет қатысты.